‘बिग बॉस मराठी’च्या दुसऱ्या पर्वाद्वारे घराघरांत पोहोचलेली अभिनेत्री वीणा जगताप लवकरच छोट्या पडद्यावरील लोकप्रिय मालिकेतून प्रेक्षकांच्या भेटीला येणार आहे. यामध्ये वीणा नेहमीपेक्षा वेगळी भूमिका साकारणार आहे. अभिनेत्रीचे मालिकेमधील लूकचे फोटो सध्या सोशल मीडियावर व्हायरल झाले आहेत. ‘बिग बॉस मराठी’नंतर वीणाने काही मालिकांमध्ये काम केले परंतु, त्यानंतर तिने टीव्ही माध्यमापासून काही काळ ब्रेक घेतला होता. आता पुन्हा एकदा प्रेक्षकांचे मनोरंजन करण्यासाठी वीणा सज्ज झाली आहे.
हेही वाचा : “लक्ष्मीच्या पावलांनी हे पदरात…”, ‘बाईपण भारी देवा’ला ५० दिवस पूर्ण, केदार शिंदेंनी शेअर केलेली पोस्ट चर्चेत
‘योग योगेश्वर जय शंकर’ या कलर्स वाहिनीवरील लोकप्रिय मालिकेत वीणा जगताप महत्त्वाची भूमिका साकारताना दिसणार आहे. मालिकेच्या नव्या कथानकानुसार वीणा जगताप ‘योगदायिनी पार्वती माता’ ही भूमिका साकारणार आहे. अभिनेत्रीला या नव्या भूमिकेत पाहण्यासाठी तिचे चाहते प्रचंड उत्सुक आहेत. वीणाचा मालिकेतील पहिला लुक समोर आला आहे. तिला या नव्या लूकमध्ये ओळखणेही कठीण झाले आहे.
वीणा जगतापने काही महिन्यांपूर्वी मेकअप आर्टिस्ट झाल्याची घोषणा सोशल मीडियावर केली होती. यानंतर ती कलाविश्वातून ब्रेक घेणार असा अंदाज वर्तवला जात होता परंतु, आता नव्या मालिकेत एन्ट्री होणार असल्याने वीणा जगतापचे चाहचे प्रचंड आनंदी आहेत. इन्स्टाग्रामवर तिच्यावर कौतुकाचा वर्षाव करण्यात येत आहे.
दरम्यान, ‘राधा प्रेम रंगी रंगली’ या मालिकेतून वीणाने मनोरंजन विश्वात पदार्पण केले. यानंतर अभिनेत्री ‘बिग बॉस मराठी’च्या दुसऱ्या पर्वात सहभागी झाली होती. बिग बॉसमध्ये चांगली कामगिरी करत वीणाने अंतिम फेरी गाठली होती. यानंतर ‘आई माझी काळुबाई’, ‘तुझ्या माझ्या संसाराला आणि काय हवं’, ‘ठिपक्यांची रांगोळी’ या मालिकांमध्ये वीणाने महत्त्वाच्या भूमिका साकारल्या होत्या.
