Bigg Boss 18 : हिंदी ‘बिग बॉस’च्या १८व्या पर्वाला ६ ऑक्टोबरपासून दमदार सुरुवात झाली आहे. यंदाच्या पर्वात १८ सदस्यांसह एक गाढव सहभागी झालं आहे. पहिल्या दिवसापासून प्रत्येक सदस्याचं कोणत्या ना कोणत्या सदस्याशी खटके उडत आहेत. नुकतीच या पर्वातील पहिली नॉमिनेशन प्रक्रिया पार पडली. यावेळी गुणरत्न सदावर्तेंसह पाच सदस्य नॉमिनेट झाले.
९ ऑक्टोबरच्या भागात नॉमिनेशन प्रक्रिया पाहायला मिळाली. ‘मौत का फर्मान’ असं नॉमिनेशन प्रक्रियाचं नावं होतं. ‘मौत का फर्मान’ नावाच्या भिंतीवर सर्व १८ सदस्यांचे फोटो लावण्यात आले होते. या सदस्यांपैकी कोणत्या सदस्याचा ‘बिग बॉस’च्या घरातील प्रवास थांबवायचा आहे, त्याचं नाव सांगायचं होतं. ‘बिग बॉस’कडून एक दूत पाठवण्यात आला होता. जो सदस्यांनी बहुमताने घेतलेल्या नावाच्या फोटोवर बाण मारणार होता. तीन पेक्षा अधिक जणांनी ज्या सदस्याचं नाव घेतलं तो सदस्य नॉमिनेट होणार होता. त्याप्रमाणे सर्वात आधी चाहत पांडेचं नाव घेण्यात आलं. चाहतला सर्वाधिक १० सदस्यांनी नॉमिनेट केलं.
त्यानंतर गुणरत्न सदावर्तेंना सहा सदस्यांनी नॉमिनेट केलं. यावेळी सदावर्ते आणि करण मेहरामध्ये वाद झाले. करण मेहरा सदावर्तेंना नॉमिनेट करत म्हणाला की, हे खेळात दिसत नाहीत. नुसते पडून आणि जास्त करून झोपून असतात. यावर गुणरत्न सदावर्ते उत्तर देत म्हणतात, “यांचं नाव काय आहे? हां, करण मेहरा. यांना मी जास्त पाहिलं नाही.” तेव्हा करण मेहरा म्हणतो, “तुमचंही नाव इथे कोणालाच माहित नव्हतं.” तेव्हा गुणरत्न सदावर्तेंचा पारा चढतो. ते म्हणतात की, नाही माहीत, ठीक आहे ना. डंके की चोट पे बोलत आहे. त्यावेळेस करण म्हणतो, “आता तुम्हाला डंके की चोट पे दाखवतो.”
दरम्यान, चाहत आणि गुणरत्न सदावर्तेंसह करण मेहरा, अविनाश मिश्रा, मुस्कान बामने हे सदस्य नॉमिनेट झाले आहेत. आता या पाच सदस्यांपैकी पहिल्याच आठवड्यात कोण ‘बिग बॉस’च्या घराबाहेर होणार हे पाहणं महत्त्वाचं असणार आहे.
