Bigg Boss 18: ‘बिग बॉस’चा महाअंतिम सोहळा जसजसा जवळ येत आहे, तशी सदस्यांमधली चुरस वाढत आहे. सध्या घरात नऊ सदस्य बाकी आहेत. विवियन डिसेना, करणवीर मेहरा, शिल्पा शिरोडकर, रजत दलाल, अविनाश मिश्रा, श्रुतिका अर्जुन, चुम दरांग, चाहत पांडे आणि ईशा सिंह या नऊ सदस्यांमधून कोण-कोण अंतिम आठवड्यापर्यंत पोहोचतंय? हे पाहणं उत्सुकतेचं आहे. नुकताच ‘तिकीट टू फिनाले’चा टास्क पार पडला. या टास्कमध्ये विवियन ज्या आक्रमकतेने खेळला हे प्रेक्षकांच्या चांगलंच पसंतीस पडल्याचं दिसत आहे.
नुकताच ‘कलर्स टीव्ही’च्या इन्स्टाग्राम पेजवर ‘बिग बॉस’च्या १८व्या पर्वातील एक प्रोमो शेअर करण्यात आला आहे. ज्यामध्ये विवियन आणि चुम दुसरा ‘तिकीट टू फिनाले’चा टास्क खेळताना दिसत आहेत. यावेळी टास्क जिंकण्यासाठी विवियन ज्या पद्धतीने खेळत आहे, त्याने सगळ्यांचं लक्ष वेधलं आहे. त्यामुळे प्रोमोवर नेटकरी प्रतिक्रिया देत विवियनच्या खेळाचं कौतुक करत आहेत.
हेही वाचा – Bigg Boss 18: महाअंतिम सोहळ्याच्या १० दिवसांआधी झालं ‘मिड वीक एविक्शन’, कमी मतांमुळे ‘हा’ सदस्य घराबाहेर
दरम्यान, ८ जानेवारीच्या भागात ‘तिकीट टू फिनाले’चा पहिला टास्क पार पडला. यामध्ये विवियन आणि करणवीरने बाजी मारली. पण करणवीर चुमसाठी खेळत होता. त्यामुळे दुसऱ्या ‘तिकीट टू फिनाले’चा टास्क विवियन विरुद्ध चुम झाला. या टास्कमध्ये एक स्ट्रेचर देण्यात आलं होतं. या स्ट्रेचरमध्ये गोल्डन आणि सिल्व्हर रंगाच्या छोट्या विटा जमा करायच्या होत्या. गोल्डन विटा विवियनच्या आणि सिल्व्हर विटा चुमच्या होत्या. त्यामुळे विवियन, चुमच्या समर्थकांना या विटा गोळा करून स्ट्रेचरमध्ये टाकायच्या होत्या. ते स्ट्रेचर एका बाजूला विवियन तर दुसऱ्या बाजूला चुमला पकडायचं होतं. स्ट्रेचरमध्ये ज्या रंगाच्या सर्वाधिक विटा असणार होत्या, तो सदस्य ‘तिकीट टू फिनाले’ जिंकणार होता.
‘तिकीट टू फिनाले’च्या दुसऱ्या टास्कमध्ये विवियन चुमला जिंकू न देण्यासाठी बऱ्याच गोष्टी करताना दिसला. कधी त्याने चुमच्या सिल्व्हर विटा कमी करण्यासाठी स्ट्रेचरला लाथ मारली. तसंच बळाचा वापर करून स्ट्रेचर उलट करताना दिसला. तर कधी त्याने थेट स्ट्रेचरमधील उलट करण्यासाठी चुमला फरफटतं नेलं. विवियनचा हा अवतार नेटकऱ्यांना फारच आवडला असून त्याला पाठिंबा देताना दिसत आहेत.
“काहीही बोला विवियन बरोबर आहे”, “चुमने सुरुवात केली आणि विवियन चुकीचा ठरला…खरंच?”, “जनता विवियनच्या पाठिशी आहे”, “चुम दुखापत झाल्याचं नाटक करतेय”, “विवियन असाच खेळत राहा”, “विवियन आम्ही तुझ्या पाठिशी आहोत”, अशा अनेक प्रतिक्रिया उमटल्या आहेत. एका नेटकऱ्याने लिहिलं आहे, “विवियन असाच खंबीर राहा. आम्ही तुझ्याबरोबर आहोत.” तर दुसऱ्या नेटकऱ्याने लिहिलं की, विवियन बरोबर खेळत आहे. चुम स्वतः जमिनीवर झोपली होती. विवियने दुखापत होईल, असं सावधही केलं होतं. विवियन तू बरोबर आहेस.”
दरम्यान, ‘बिग बॉस’च्या १८व्या पर्वाचा सध्या १४वा आठवडा सुरू आहे. रजत दलाल, चाहत पांडे आणि श्रुतिका अर्जुन नॉमिनेट झाले आहेत. या सदस्यांमधून आता कोण घराबाहेर होतंय? हे पाहणं महत्त्वाचं असणार आहे.
