‘बिग बॉस मराठी’चं चौथं पर्व दिवसेंदिवस रंजक होत आहे. घरात आता मोजकेच सदस्य उरले आहेत. काही दिवसांनंतर या पर्वाचा अंतिम सोहळा पार पडेल. पण त्याचपूर्वी हा आठवडा घरातील सदस्यांसाठी फॅमिली विक आहे. म्हणजेच सदस्यांना त्यांच्या घरातील मंडळी भेटण्यासाठी ‘बिग बॉस मराठी’च्या घरामध्ये येत आहेत.
आणखी वाचा – Video : “बाबा तू ये ना” वडिलांना पाहून चिमुकल्याच्या भावना अनावर, आरोह वेलणकरच्या लेकाने सगळ्यांनाच रडवलं
कोणाचे आई-वडील, कोणाची पत्नी तर कोणाची मुलं ‘बिग बॉस मराठी’च्या फॅमिली विक आठवड्यात येताना दिसत आहेत. दरम्यान प्रसाद जावेदेचे आई-वडिलही त्याला भेटण्यासाठी घरामध्ये आले. यावेळी प्रसादचं एक वेगळंच रुप पाहायला मिळालं.
प्रसाद बऱ्याचदा ‘बिग बॉस मराठी’च्या घरामध्ये स्वतःच्या विचारांत गुंतलेला दिसला. याबाबत त्याला बरंच ट्रोल करण्यात आलं. पण जेव्हा आई-वडील घरात आले तेव्हा त्याच्या अश्रूंचा बांध फुटला. अगदी लहान मुलासारखा तो आईच्या कुशीत जाऊन रडला. शिवाय बाबांनाही त्याने घट्ट मिठी मारली. प्रसादच्या आईने यावेळी इतर सदस्यांनाही प्रेम दिलं.
यावेळी प्रसादच्या आईने अपूर्वालाही जवळ घेतलं. प्रसादच्या आईने कोणाला दुखावू नका तसेच कोणाबाबत मनात राग ठेवू नका असा सगळ्यांना सल्ला दिला. यावेळी अपूर्वा नेमळेकरने प्रसादच्या आईची माफी मागितली. खरं तर यावेळी प्रसादच्या आईला पाहून घरातील सगळेच सदस्य ढसाढसा रडू लागले.
