Bigg Boss Marathi 5 वे पर्व सध्या चांगलेच गाजताना दिसत आहे. सतत कोणत्या ना कारणाने बिग बॉसच्या घरातील सदस्यांची चर्चा होत असते. बिग बॉसच्या घरातील स्पर्धक ज्या पद्धतीने व्यक्त होत असतात, ज्या पद्धतीने खेळ खेळतात, इतर सदस्यांविषयी बोलतात, त्याचे पडसाद बाहेरच्या जगात उमटताना दिसतात. प्रेक्षक, कलाकार मंडळी त्यावर व्यक्त होताना दिसतात. आता अभिनेता सुशील इनामदारने एका मुलाखतीदरम्यान पंढरीनाथ कांबळेच्या बिग बॉसमध्ये जाण्याच्या निर्णयावर वक्तव्य केले आहे.
काय म्हणाला अभिनेता?
अभिनेता सुशील इनामदारने ‘अल्ट्रा मराठी बझ’ या यूट्यूब चॅनेलला मुलाखत दिली. या मुलाखतीदरम्यान त्याने बिग बॉसमधील अनेक सदस्यांच्या खेळावर वक्तव्य केले आहे.
पंढरीनाथ कांबळेबद्दल बोलताना त्याने म्हटले, “पॅडी बिग बॉसमध्ये जाणे, हा त्याच्यासाठी म्हणून मोठा निर्णय होता. कारण- बिग बॉसचा जो एक फॉरमॅट आहे, ते जे घर आहे, ते अनाकलनीय आहे. तिथे काय घडेल ते सांगता येत नाही हे प्रेक्षक म्हणून आणि जे स्पर्धक याआधी सहभागी झाले होते, त्यांच्या अनुभवातून समजतं. त्यानं जेव्हा हा निर्णय घेतला असेल तेव्हा तो खूप विचार करून घेतला असेल, याची मला खात्री आहे.”
पुढे बोलताना सुशील म्हणतो, “याआधी मी कधीतरी बिग बॉसचे एपिसोड बघायचो; पण आता पॅडीमुळे मी दररोज मला जसा वेळ मिळेल तेव्हा बिग बॉसचे सगळे एपिसोड बघतो. तो ओढून-ताणून गोष्टीमध्ये येईल, अशा स्वभावाचा तो नाही. तो जसा आहे, तसाच बिग बॉसमध्येदेखील दिसतोय. तो ट्रॉफी जिंकेल की नाही याचे ठोकताळे मी मांडत बसणार नाही. पण ज्या पद्धतीने तो बिग बॉसमध्ये खेळ खेळतोय, त्यामुळे त्यानं प्रेक्षकांची मनं जिंकून घेतली आहेत,” असे वक्तव्य सुशील इनामदार यांनी केले आहे.
हेही वाचा: प्रसिद्ध अभिनेत्याने गुपचूप उरकलं लग्न, कूर्गमध्ये अभिनेत्रीशी बांधली लग्नगाठ, फोटो आले समोर
सुशील इनामदार आणि पंढरीनाथ कांबळे यांनी नाटकामध्ये एकत्र काम केले आहे. जान्हवी किल्लेकरने पंढरीनाथ कांबळेचा ज्या शब्दांत अपमान केला होता, त्यावर अनेक कलाकारांनी सोशल मीडियावर टीका केली होती. त्यामध्ये सुशील इनामदार यांचाही समावेश होता.
दरम्यान, बिग बॉसच्या घरात दररोज नवीन भांडणे होत असताना दिसत आहेत. घरातील काही सदस्य इतर सदस्यांबरोबर ज्या पद्धतीने वागतात, त्यावर प्रेक्षक आणि कलाकार सोशल मीडियावर टीका करताना दिसतात. आता आज पार पडणाऱ्या भाऊच्या धक्क्यावर रितेश देशमुखकडून कोणत्या सदस्याला त्याच्या वागण्याबद्दल शाबासकी मिळणार आणि कोणत्या सदस्याची कानउघडणी होणार, हे पाहणे महत्त्वाचे ठरणार आहे.
याबरोबरच या आठवड्यात आर्या, अभिजीत सावंत, इरिना व वैभव चव्हाण हे सदस्य नॉमिनेट झाले आहेत. आता यामधील कोणता सदस्य घराबाहेर पडणार, हे पाहणेदेखील महत्त्वाचे ठरणार आहे.
