Bigg Boss Marathi5 च्या घरात सदस्य दररोज कोणत्या ना कारणाने चर्चेत असतात. कधी भांडण, कधी टास्क, तर कधी एकत्र केलेली मजामस्ती यांमुळे बिग बॉसच्या घरातील सदस्य चर्चेत असल्याचे पाहायला मिळते.
आता ‘कलर्स मराठी’ वाहिनीने एक प्रोमो सोशल मीडियावर शेअर केला आहे. त्या प्रोमोमध्ये बिग बॉसने घरातील सदस्यांना कॅप्टनचे पद मिळविण्यासाठी एक टास्क दिल्याचे पाहायला मिळत आहे.
‘कलर्स मराठी’ वाहिनीने इन्स्टाग्रामच्या अधिकृत अकाउंटवर एक प्रोमो शेअर केला आहे. या प्रोमोमध्ये घरातील सर्व सदस्य एकत्र जमा झाले आहेत. बिग बॉसने या सदस्यांना टास्क दिला आहे. या टास्कमध्ये दोन गट असणार आहेत. टीम ए आणि टीम बी, असे हे गट आहेत. या दोन्ही टीमसाठी दोन बोटी दिल्या आहेत. या बोटीत बसून मोती शोधायचे असून, कॅप्टनच्या पदाच्या उमेदवारांना बाजूला करायचे आहे, असे या टास्कचे स्वरूप आहे.
कॅप्टनच्या पदासाठी स्पर्धकांमध्ये चढाओढ
प्रोमोमध्ये दाखविल्याप्रमाणे एका मोठ्या बॉक्समध्ये हे मोती आहेत आणि ते घेण्यासाठी सदस्यांमध्ये चढाओढ दिसत आहे. त्याबरोबरच हे सदस्य एकमेकांना अडवत असून दुसऱ्या टीमने टास्क पूर्ण करू नये यासाठी प्रयत्न करताना दिसत आहे. या प्रोमोमध्ये सदस्यांत पुन्हा भांडण झाल्याचे चित्र दिसत आहे. प्रोमोच्या शेवटी अभिजीत सावंतला दुखापत झाल्याचे पाहायला मिळते.
आता कोणत्या टीममध्ये कोणता सदस्य असणार, कोणती टीम हा टास्क जिंकत कॅप्टनच्या पदाची उमेदवारी मिळवणार आणि प्रेक्षकांना कोणाचा खेळ आवडणार हे संपूर्ण भाग प्रदर्शित झाल्यावर पाहायला मिळणार आहे. त्याबरोबरच अभिजीत सावंतला दुखापत कशी झाली, हेदेखील बिग बॉसच्या संपूर्ण एपिसोडमध्ये पाहायला मिळणार आहे.
दरम्यान, बिग बॉसच्या पाचव्या पर्वात पहिली कॅप्टन ही अंकिता वालावलकर झाली होती. आता या पर्वात दुसरा कॅप्टन कोणता सदस्य होणार, हे पाहणे महत्त्वाचे ठरले होते. बिग बॉसच्या खेळात कॅप्टन पद अतिशय महत्त्वाचे मानले जाते. कारण- कॅप्टन असलेल्या व्यक्तीकडे विशेषाधिकार असतात. त्याला घरातील निर्णय घेण्याचे अधिकार मिळतात. त्यामुळे ज्या टीममधील सदस्य कॅप्टन होईल, त्या टीमलादेखील त्याचा फायदा होतो. आता कोणता सदस्य कॅप्टनचे पद आपल्या नावावर करणार हे पाहणे महत्त्वाचे ठरणार आहे.
