‘बिग बॉस मराठी ५’फेम गायक अभिजीत सावंत हा त्याच्या नवीन गाण्यामुळे मोठ्या चर्चेत आला आहे. तो दिवाळीनिमित्त भावा-बहिणीच्या नात्यावर आधारित एक नवीन गाणे प्रेक्षकांच्या भेटीला घेऊन आला आहे. सारेगम मराठीने अभिजीत सावंतचे गाणे सोशल मीडियावर शेअर केले आहे.
भावा-बहिणीच्या नात्यावर अभिजीत सावंतचे मंत्रमुग्ध करणारे गाणे
भावा-बहिणीच्या नात्यावर आधारित हे गाणे असून याचे ‘लाडकी बहीण’ असे नाव आहे. हे गाणे सोशल मीडियावर शेअर करत सारेगम मराठीने, “सगळ्या भाऊ- बहिणींसाठी घेऊन आलोय एक नवीन गाणं, ‘लाडकी बहीण’ आपल्या लाडक्या अभिजीत सावंतला खूप प्रेम द्या”, असे कॅप्शन दिले आहे.
चाहत्यांना हे गाणं आवडत असल्याचे सोशल मीडियावर पाहायला मिळत आहे. गेल्या काही दिवसांपासून अभिजीत सावंतने विविध पोस्टच्या माध्यमातून भावा-बहिणीच्या नात्यावर असे गाणे येणार असल्याचे सांगितले होते. आता ‘बिग बॉस मराठी ५’नंतर अभिजीत या गाण्यातून प्रेक्षकांच्या भेटीला आला आहे. आता प्रेक्षकांना ते आवडणार का, हे पाहणे महत्त्वाचे ठरणार आहे.
अभिजीत सावंतने शेअर केलेल्या या व्हिडीओवर जान्हवी किल्लेकर, पुरुषोत्तम दादा पाटील यांनी कमेंट करत अभिजीतचे कौतुक केले आहे. पुरुषोत्तम दादा पाटील यांनी लिहिले, “एकदम भारी अभिजित दादा, ह्या भाऊबीजेला लाडक्या बहिणीचं यथार्थ वर्णन”. चाहत्यांनीदेखील अभिजीतच्या गाण्याचे आणि त्याच्या आवाजाचे कौतुक केले आहे. अनेक नेटकऱ्यांनी “खूप छान दादा”, “एकदम भारी गायलास तू”, अशा कमेंट करत त्याचे कौतुक केले आहे.
दरम्यान, अभिजीत सावंत हा त्याच्या अनेक लोकप्रिय गाण्यांसाठी ओळखला जातो. इंडियन आयडॉल सीझन पहिला या पर्वात सहभागी होत त्याने ट्रॉफी जिंकली होती. त्यानंतर काही गाण्यांमधून तो प्रेक्षकांच्या भेटीला आला होता. नुकत्याच पार पडलेल्या ‘बिग बॉस मराठी ५’मध्ये अभिजीत सावंत सहभागी झाला होता. या शोमध्ये त्याने आपल्या वागण्याने आणि खेळाने प्रेक्षकांचे मन जिंकले. मात्र त्याला उपविजेतेपदावर समाधान मानावे लागले. या पर्वाचा विजेता सूरज चव्हाण ठरला आहे. आता अभिजीत आणखी कोणत्या नवीन प्रोजेक्टमधून प्रेक्षकांच्या भेटीला येणार हे पाहणे महत्त्वाचे ठरणार आहे.
