Bigg Boss Marathi Jahnavi Killekar Exit : ‘बिग बॉस मराठी’च्या ग्रँड फिनालेला मोठ्या दणक्यात सुरुवात झालेली आहे. रितेश देशमुखने जवळपास २ आठवड्यांनी भाऊच्या धक्क्यावर पुनरागमन केलं आहे. घरात आल्यावर सर्वप्रथम रितेश देशमुखने सर्व स्पर्धकांचं कौतुक केलं. यानंतर पहिल्या एव्हिक्शनसाठी अभिनेत्याने ‘बिग बॉस’च्या घरात एन्ट्री घेतली.
रितेशने पहिल्या एव्हिक्शनसाठी घरात एन्ट्री घेतल्यावर सगळ्या सदस्यांना अ‍ॅक्टिव्हिटी एरियामध्ये बोलावण्यात आलं. यानंतर स्पर्धकांसमोर तब्बल ९ लाख रुपये असणाऱ्या दोन बॅगा ठेवण्यात आल्या. “जर बझर वाजवून या बॅगा उचललात तर, हे पैसे तुमचे होतील अन्यथा मी एलिमिनेट होणाऱ्या सदस्याचं नाव जाहीर करतो” असं रितेशने जाहीर केलं.
जान्हवीने थोडावेळ वाट पाहिली आणि काही वेळातच ती बझरकडे जाऊन उभी राहिली. अभिनेत्री भावुक होत म्हणाली, “या सीझनमध्ये मी फार चुकीचं वागले. मी उद्धट बोलले, मोठ्यांचा अपमान केला. मला माहितीये की, लोकांचा राग शांत झालेला नाहीये. हा गेम आहे आणि हा बिग बॉसने दिलेला एक टास्क आहे. टास्क पूर्ण नाही केला, तर बिग बॉस चिडतात. मी प्रायश्चित म्हणून हा बझर वाजवते आणि हा खेळ सोडते.”
जान्हवीने ९ लाखांची Money बॅग उचलून हा खेळ सोडला आहे. बाहेर येताच रितेशने तिच्या कुटुंबीयांची याबाबत प्रतिक्रिया विचारली. यावर तिचे पती किरण किल्लेकर म्हणाले, “तिचा निर्णय परफेक्ट होता. तू आमच्यासाठी विनर आहेस.” याशिवाय रितेशने जर ही बॅग उचलली नसती, तरीही जान्हवी सहाव्या क्रमांकावर बाद झाली असती असं जाहीर केलं. यानंतर सर्वांनीच तिच्या निर्णयाचं कौतुक केलं.
