Bigg Boss Marathi Jahnavi Killekar : ‘बिग बॉस मराठी’च्या पाचव्या सीझनमध्ये जेलमध्ये जाणारी पहिली स्पर्धक जान्हवी किल्लेकर ठरली. घरात केलेली चुकीची वक्तव्य, वर्षा व पॅडीचा केलेला अपमान या सगळ्या गोष्टींसाठी शिक्षा म्हणून जान्हवीला जेलमध्ये टाकण्यात आलं होतं. तसेच यापुढे तुम्हाला भाऊच्या धक्क्यावर जागा नाही असं स्पष्ट शब्दांत रितेशने तिला सांगितलं होतं. तेव्हापासून जान्हवीच्या वागण्या-बोलण्यात बराच फरक पडला. तिने १ आठवडा संपूर्ण वेळ जेलमध्ये घालवत तिला दिलेल्या शिक्षेचा कालावधी पूर्ण केला आहे.
‘बिग बॉस मराठी’च्या शुक्रवारी प्रसारित झालेल्या भागात जान्हवीला जेलमधून मुक्त केल्याचं पाहायला मिळालं. बाहेर येताच तिने पुन्हा एकदा सर्व प्रेक्षकांची व ‘बिग बॉस’ची माफी मागितली. शिक्षा भोगून झाल्यावर आता रितेश देशमुख अभिनेत्रीला काय सांगतो याकडे सगळ्यांचं होतं. अर्थात, रितेशने जान्हवीच्या खेळाचं ( पाताळ लोक टास्क ) कौतुक केलंच परंतु, तिला भाऊच्या धक्क्यावर बसण्यास एपिसोडच्या सुरुवातीलाच मनाई करण्यात आली.
रितेश देशमुख जान्हवीला काय म्हणाला?
रितेश सर्व सदस्यांकडे ‘जोडीचा मामला’ या टास्कबद्दल विचारपूस करण्यास सुरुवात करणार असतो. एवढ्यात अभिनेता जान्हवीला पाहून बाहेर जाऊन बसण्यास सांगतो. रितेश म्हणतो, “जान्हवी मी गेल्या आठवड्यात सांगितल्याप्रमाणे तुम्ही भाऊच्या धक्क्यावर बसू शकत नाही. त्यामुळे बाहेर चला…तुम्ही गार्डन एरियामध्ये जाऊन बसा.”
रितेशने आदेश दिल्यावर जान्हवी प्रचंड भावुक होऊन बाहेरची वाट धरते. रडत-रडत ती गार्डन परिसरात जाते. याठिकाणी एक खुर्ची व भाऊचा धक्का लाइव्ह पाहण्यासाठी टीव्हीची व्यवस्था आधीच केलेली असते. हा प्रसंग शनिवारच्या भागात घडला. यानंतर रविवारच्या ( १ सप्टेंबर ) भागात रितेशने सर्व सदस्यांना ‘जोडीचा मामला’ या टास्कमधून मुक्त केलं. तेव्हा देखील अभिनेत्याने जान्हवीला इतर सदस्यांपासून वेगळं खुर्चीवर बसण्यास सांगितलं. याचा अर्थ जेलमधून बाहेर आली असली, तरीही जान्हवीला भाऊच्या धक्क्यावर बसू न देण्याची शिक्षा कायम ठेवली जाणार आहे.
हेही वाचा : Bigg Boss Marathi : …अन् रितेशने घेतली अंकिताची फिरकी! आधी केला Eliminationचा प्रँक, नंतर सल्ला देत म्हणाला, “कॅप्टन्सी हलक्यात…”
दरम्यान, आता येत्या आठवड्यात जेलमधून बाहेर आल्यावर जान्हवी घरात कशी वागणार हे पाहणं महत्त्वाचं ठरणार आहे. कारण, शिक्षा झाल्याने ती गेल्या आठवड्यात जेलमध्ये बंद होती. त्यामुळे अभिनेत्रीला आठवडाभर स्वत:चा गेम दाखवता आलेला नाही. आता घरात ती कसं खेळणार याकडे सर्वांचं लक्ष असेल.
© IE Online Media Services (P) Ltd