“आता मी ट्रॉफी आणि जावई घेऊनच येते घरी”, अंकिता वालावलकरच्या ‘त्या’ पोस्टने वेधलं लक्ष, म्हणाली, “बाबा…”

अंकिता वालावलकरच्या इन्स्टाग्रामवर शेअर करण्यात आलेल्या या पोस्टमध्ये तिच्या बाबांचा गणपती विर्सजन केल्यानंतरचा फोटो पाहायला मिळत आहे. या फोटोत अंकिताच्या वडिलांच्या डोक्यावर पाट आणि एका हातात फटाक्यांची पिशवी दिसत आहे. तर दुसऱ्या फोटोंमध्ये तिच्या घरचा बाप्पा पाहायला मिळत आहे.

हेही वाचा – “अभी तो खेल शुरु हुआ हैं…” म्हणत विशाखा सुभेदारने पंढरीनाथ कांबळेचं केलं कौतुक, म्हणाली, “अंदाजे तुझं वय वर्षे ५२ असावं, पण…”

हे फोटो शेअर करत अंकिता वालावलकरच्या पोस्टमध्ये लिहिलं आहे की, बाबा, आतापर्यंत आपल्यात बरेच आंबट गोड खटके उडलेत. कधी तुम्ही चिडलात तर कधी मी रुसले. पण खरं सांगू बाबा कितीही मतभेद असले तरी तुम्ही आमच्यासाठी घेतलेली मेहनत आणि तुमचं प्रेम आम्हाला नेहमी दिसलं. आज ही कृतज्ञता मला व्यक्त करायची आहे.

पुढे अंकिता वालावलकरने लिहिलं आहे, “लहानपणी मी ठरवलं होतं की मुलगी असून मी तुम्हाला कसलीच कमी कधी जाणवू देणार नाही. लहानपणी फटाक्यांसाठी हट्ट करायचो पण तुम्ही महाग म्हणून द्यायचा नाहीत आणि आता नेहमी फटाके घेऊन समुद्रावर येता आणि आम्ही वाजवत देखील नाही. तुमच्या हातातली ती फटाक्यांची पिशवी कायम भरलेलीच असते.”

हेही वाचा – ‘मन धागा-धागा जोडते नवा’ फेम मयुरी देशमुखला गणेशोत्सवातील ‘ही’ गोष्ट अजिबात आवडत नाही, म्हणाली, “माझ्या घरात…”

“नेहमी गणपतीत माझी गडबड असायची कोण पाट उचलणार, विसर्जनच्या वेळी कोणी असेल ना? कारण मुलगी म्हणून इथे मी नेहमी कमी पडले. शाडू मातीची २-३ फुट उंचीची मूर्ती उचलणं मला जमण्यासारखं नाही आणि नव्हतं. पण बिग बॉसच्या घरी असताना देखील खूप आधी मी ह्या सगळ्याची व्यवस्था करून आलेय. तुम्हाला काळजी करावी लागणार नाही, सातव्या दिवशी माझे मित्र नक्की घरी येतील आणि मूर्ती विसर्जनाला मदत करतील. काळजी करू नका. गेल्यावर्षी बाप्पाबरोबर रात्री गप्पा मारल्या होत्या मी जेव्हा सगळे झोपले होते, आता मी ट्रॉफी आणि जावई घेऊनच येते घरी…,” असं अंकिता वालावलकरच्या पोस्टमध्ये लिहिलं आहे.

हेही वाचा – Video: सूरज चव्हाणला येतेय गावची आठवण, म्हणाला, “मी साधा आणि सनकी आहे, पण इथे…”

दरम्यान, अंकिता वालावलकरची ही पोस्ट चांगलीच व्हायरल झाली आहे. तिच्या या सुंदर पोस्टवर नेटकऱ्यांनी भरभरून प्रतिक्रिया दिल्या आहेत. “तुझ्यासारखी मुलगी मिळायला नशीब लागतं”, “सामान्य मनाचं असामान्य व्यक्तिमत्त्व”, “खूप छान लिहिलंय डोळे पाणावले”, “तूच जिंकणार”, अशा प्रतिक्रिया नेटकऱ्यांच्या उमटल्या आहेत.