Bigg Boss Marathi Season 5 : ‘बिग बॉस मराठी’च्या पाचव्या पर्वातील गाजलेला आणि अधिक पाहिला जाणारा ‘भाऊचा धक्का’ सध्या रितेश देशमुख शिवाय सुरू आहे. कामानिमित्ताने परदेशात असल्यामुळे रितेशची जागा डॉ. निलेश साबळेने घेतली आहे. सलग दुसऱ्या आठवड्यात ‘भाऊच्या धक्क्या’वर रितेश गैरहजर आहे. पण या गैरहजेरीत अनेक पाहुणे ‘बिग बॉस’ घरात उपस्थित राहत आहेत.
शनिवारी ( २८ सप्टेंबर ) ‘बिग बॉस मराठी’च्या दुसऱ्या पर्वातील अभिजीत बिचुकले, पहिल्या पर्वातील पत्रकार अनिल थत्ते आणि चौथ्या पर्वात गाजलेली राखी सावंत हे खास पाहुणे म्हणून उपस्थित राहिले. या खास पाहुण्यांनी आपापल्या शैलीत कोणाचं कौतुक केलं तर कोणाची कानउघडणी केली. एकप्रकारे सदस्यांना आरसा दाखवण्याचं काम या खास पाहुण्यांनी केलं, असं म्हणायला काही हरकत आहे. आजच्या ( २९ सप्टेंबर ) ‘भाऊच्या धक्क्या’वरही खास पाहुणे उपस्थित राहणार आहेत.
हेही वाचा – Video : ‘नगं थांबू रं…’, मनाला भिडणारं ‘पाणी’ चित्रपटातील शीर्षकगीत प्रदर्शित, पाहा
‘फुलवंती’ चित्रपटातील कलाकार अभिनेत्री प्राजक्ता माळी आणि गश्मीर महाजनी ‘बिग बॉस’ घरात प्रवेश करणार आहेत. यावेळी सदस्यांबरोबर ते विविध खेळातून धमाल-मस्ती करताना पाहायला मिळणार आहेत. याशिवाय १८ ऑक्टोबरला प्रदर्शित होणाऱ्या ‘पाणी’ चित्रपटातील आदिनाथ कोठारे आणि सुबोध भावे देखील ‘बिग बॉस’ घरात खास पाहुणे म्हणून उपस्थित राहणार आहेत. नुकताच त्यांचा प्रोमो समोर आला आहे.
‘कलर्स मराठी’च्या सोशल मीडियावर शेअर करण्यात आलेल्या प्रोमोमध्ये ‘पाणी’ चित्रपटाचा दिग्दर्शक, अभिनेता आदिनाथ कोठारे आणि सुबोध भावे यांची ‘बिग बॉस’च्या घरात दमदार एन्ट्री होताना दिसत आहे. त्यानंतर सुबोध भावे सूरज चव्हाणची हुबेहूब नक्कल करताना पाहायला मिळत आहे. सुबोध भावेने सूरजची केलेली नक्कल पाहून सर्व सदस्यांचं हसू अनावर झाल्याचं दिसत आहे.
प्रोमोमध्ये, सूरज सुबोध भावेला आपले लोकप्रिय डायलॉगबाजी शिकवताना दिसत आहे. यावेळीच सुबोधने सूरजची हुबेहूब नक्कल केली आहे. “तू माझ्या दिलाची परी, तुझ्या गालावर खळी, ऐ बच्च्या तुझाचं मी बाहुबली”, असं म्हणताना सुबोध भाव दिसत आहे. यानंतर सुबोध आणि आदिनाथ दोघं मिळून सूरजचा लोकप्रिय डायलॉग म्हणताना पाहायला मिळत आहेत. पण सुबोधने सूरजची केलेली नक्कल याकडे सगळ्यांचं लक्ष वेधलं आहे.
सुबोध भावेलाही सूरजने लावलं वेड, पाहा
दरम्यान, ‘बिग बॉस मराठी’च्या या प्रोमोवर नेटकऱ्यांनी भरभरून प्रतिक्रिया दिल्या आहेत. “एक नंबर”, “सुबोध एकदम कडक…”, “आपल्या सूरज भावाने महाराष्ट्रातील लोकप्रिय कलाकारांना वेड लावलं बुवा…”, अशा अनेक प्रतिक्रिया नेटकऱ्यांच्या उमटल्या आहेत.
© IE Online Media Services (P) Ltd