Bigg Boss Marathi Season 5 : ‘बिग बॉस मराठी’च्या पाचव्या पर्वातील सदस्यांमध्ये पहिल्या आठवड्यापासून चांगलीच चुरस रंगलेली पाहायला मिळत आहे. घरात दोन गट झाले आहेत. दोन्ही गटातील सदस्यांमध्ये सातत्याने वाद होत आहेत. शनिवार, रविवार रितेश देशमुखचा ‘भाऊचा धक्का’ पार पडला. या भाऊच्या धक्क्यावर रितेशने निक्की तांबोळीपासून सगळ्याच सदस्यांची चांगलीच शाळा घेतली. पहिल्या आठवड्यातच पुरुषोत्तमदादा पाटील घराबाहेर झाले. अशातच अभिनेत्री विशाखा सुभेदार हिने ‘बिग बॉस’च्या घरातील एका सदस्यासाठी खास पोस्ट लिहिली आहे. या पोस्टमधून विशाखाने सदस्याला मोलाचा सल्ला दिला आहे.
अभिनेत्री विशाखा सुभेदारने ‘बिग बॉस मराठी’च्या ( Bigg Boss Marathi ) पाचव्या पर्वातील पंढरीनाथ कांबळेसाठी खास पोस्ट केली आहे. ‘फ्रेंडशिप डे’च्या शुभेच्छा देत विशाखाने ही पोस्ट शेअर केली आहे. पॅडी कांबळेबरोबरचा फोटो शेअर करत विशाखाने लिहिलं आहे, “फ्रेंडशिप डेच्या शुभेच्छा मित्रा… तू तिथे त्यांच्या सारखा नसलास तरीही तू खूप खरा आहेस, वेगळा आहेस, सज्जन आहेस, तारेवरची कसरत तुला कायमच जमलीय. तिथेही तू मैत्री कर आणि ती निभव.. तुझ्यातले प्लस पॉइंट्स दाखवून दे…गप बसू नकोस…यारों का यार हैं तू..तुझ्या माणसासाठी तू उभा असतोस मदतीला,आज स्वतःसाठी उभा राहा..मित्रा..More power to you Paddy Kamble”
विशाखा सुभेदारची ही पोस्ट सध्या चांगलीच व्हायरल झाली आहे. या पोस्टवर तिच्या अनेक चाहत्यांनी प्रतिक्रिया दिल्या आहेत. ‘बिग बॉस मराठीमध्ये ( Bigg Boss Marathi ) तुम्ही पाहिजे होता’, असं काही चाहत्यांनी प्रतिक्रियेतून म्हटलं आहे. त्यावर विशाखा म्हणाली, “पुढच्या वेळेस.” तसंच एका चाहत्याने लिहिलं आहे, ‘मुळात तिथे गेलाच का?’ यावर विशाखा म्हणाली, “तिथे असणं त्याच्या नशिबात आहे. काही गोष्टी वरूनच आधीच ठरलेल्या असतात. आपण फक्त त्याप्रमाणे जिद्द ठेवायची म्हणून गेलाय.”
भाऊच्या धक्क्यावर रितेश देशमुखने पंढरीनाथ कांबळेला झापलं
दरम्यान, भाऊच्या धक्क्यावर रितेश देशमुखने पंढरीनाथ कांबळेला चांगलंच सुनावलं. “यंदा ‘बिग बॉस’ने ( Bigg Boss Marathi ) एका प्रेक्षकाला या घरात एन्ट्री दिलेली आहे. ते लपून छपून तुमचा खेळ पाहत आहेत. पण, स्वत: काहीच करत नाहीयेत. ते प्रेक्षक आहेत पंढरीनाथ कांबळे,” असं म्हणत रितेशने पंढरीनाथ कांबळेला खेळ खेळायला सांगितलं.
© IE Online Media Services (P) Ltd