Bigg Boss Marathi Ticket To Finale Task : ‘बिग बॉस मराठी’चा पाचवा सीझन आता अंतिम टप्प्यात येऊन पोहोचला आहे. आज स्पर्धेच्या दहाव्या म्हणजेच शेवटच्या आठवड्यात घरात ‘तिकीट टू फिनाले’चा टास्क पार पडणार आहे. या टास्कसाठी घरात खास बाबागाडी आणण्यात आली आहे. याचा प्रोमो नुकताच ‘कलर्स मराठी’च्या अधिकृत इन्स्टाग्रामवर पेजवर शेअर करण्यात आला आहे.
‘बिग बॉस’च्या घरात आजच्या ( ३० सप्टेंबर ) भागात ‘तिकीट टू फिनाले’चा टास्क पार पडणार आहे. यामध्ये सध्या घरात असणाऱ्या एकूण सात सदस्यांना बाबागाडीवर बसून हा टास्क पूर्ण करायचा आहे. या टास्कला वेळेचं बंधन असणार आहे. बाबागाडीवर फिरताना जो सदस्य कमीत कमी वेळेत हा टास्क पूर्ण करेल तोच या टास्कमध्ये बाजी मारणार आहे.
बिग बॉसच्या घरात ‘तिकीट टू फिनाले’ टास्क
सध्या ‘बिग बॉस’च्या ( Bigg Boss Marathi ) घरात अभिजीत सावंत, धनंजय पोवार, वर्षा उसगांवकर, अंकिता वालावलकर, जान्हवी किल्लेकर, सूरज चव्हाण आणि निक्की तांबोळी असे सात सदस्य आहेत. यांना बाबागाडीवर बसून हा टास्क पूर्ण करावा लागणार आहे. घरातील जो सदस्य हा टास्क कमीत वेळ पूर्ण करेल त्याला तिकीट टू फिनाले जिंकण्याची संधी मिळणार आहे.
बाबागाडीवर बसल्यावर हळुहळू पुढे सरकताना घरात सगळ्याच सदस्यांची दमछाक होत असल्याचं या प्रोमोमध्ये पाहायला मिळत आहे. मुख्य प्रवेशद्वाराजवळ डीपी या बाबागाडीवरून तोल जाऊन खाली पडतो. वर्षा उसगांवकर सुद्धा या टास्कमध्ये काहीशा थकतात. पण, अंकिता आणि सूरज अतिशय चपळतेने हा टास्क पूर्ण करत असल्याचं या प्रोमोमध्ये पाहायला मिळत आहे.
आता ‘बिग बॉस मराठी’च्या ( Bigg Boss Marathi ) पाचव्या पर्वाचं तिकीट टू फिनाले जिंकण्याची संधी नेमकी कोणाला मिळणार याबद्दल प्रत्येकाच्या मनात उत्सुकता निर्माण झाली आहे. यंदा हा शो १०० दिवसांऐवजी फक्त ७० दिवसांमध्ये प्रेक्षकांचा निरोप घेणार आहे. त्यामुळे प्रेक्षकांमध्ये काहीसं नाराजीचं वातावरण आहे. आता येत्या ६ ऑक्टोबरला ‘बिग बॉस मराठी’च्या पाचव्या पर्वाचा ग्रँड फिनाले पार पडणार आहे.
