Bigg Boss Marathi Varsha Usgaonker Eliminate : ‘बिग बॉस मराठी’च्या घरात आज ( ३ ऑक्टोबर ) मिडवीक एव्हिक्शन पार पडलं. घरातून कोणता सदस्य निरोप घेणार याबद्दल सोशल मीडियावर चांगलीच चर्चा रंगली होती. अखेर नेटकऱ्यांचा अंदाज खरा ठरला असून ‘बिग बॉस’च्या घरात ‘वंडरगर्ल’ म्हणून ओळखल्या जाणाऱ्या वर्षा उसगांवकरांनी प्रेक्षकांकडून मिळालेल्या कमी मतांमुळे या घराचा निरोप घेतला आहे.
यंदा ‘बिग बॉस’चं पर्व हे शंभर दिवसांऐवजी केवळ ७० दिवसांचं असणार आहे. त्यामुळे महाअंतिम सोहळ्याला अवघे तीन दिवस बाकी राहिलेले असताना म्हणजे ६७ दिवसांनी वर्षा उसगांवकर घरातून एलिमिनेट झाल्या आहेत. हे एलिमिनेशन प्रत्येकासाठी धक्कादायक होतं. ‘बिग बॉस’च्या घरात सध्या वर्षा यांच्या सर्वात जवळ असलेली जान्हवी यावेळी प्रचंड भावुक झाली होती.
अंकिता आणि वर्षा उसगांवकर या दोघीही बॉटम-२ मध्ये होत्या. मात्र, शेवटी अंकिताने टॉप-६ फायनलिस्टमध्ये स्थान मिळवलं आणि वर्षा यांनी या घराचा निरोप घेतला. अभिनेत्री एक्झिट घेताना काय म्हणाल्या जाणून घेऊयात…
हेही वाचा : Bigg Boss Marathi : अभिजीत सावंत ठरला ‘बिग बॉस मराठी’चा दुसरा Finalist! ग्रँड फिनालेमध्ये एन्ट्री घेणारा तिसरा स्पर्धक कोण? जाणून घ्या…
वर्षा उसगांवकर घरातून एक्झिट घेताना काय म्हणाल्या?
वर्षा उसगांवकर सर्व प्रेक्षकांना व घरातील सदस्यांना उद्देशून त्यांच्या प्रवासाबद्दल म्हणाल्या, “मी इथे काय नाही शिकले…सगळ्यात महत्त्वाचं म्हणजे मी इथे कोथिंबीर निवडायला शिकले, जे मी आजपर्यंत कधीच केलं नव्हतं आणि सर्वात महत्त्वाचं म्हणजे अपमान तोंडावर पचवायला शिकले. पण, काही हरकत नाही. कारण, सगळी स्वप्न सत्यात उतरायला पाहिजे असं काही नसतं. ‘बिग बॉस’ आणि जनतेच्या इच्छेपुढे कोणीही नाही. धन्यवाद महाराष्ट्र!”
अभिनेत्रीने त्यांचं मनोगत व्यक्त केल्यावर ‘बिग बॉस’ त्यांच्या खेळाचं कौतुक करत म्हणाले, “वर्षा आपण घरात दाखवलेला उत्साह, आपला वावर खरंच अनेकांसाठी प्रेरणादायी ठरला. आज आपण घराबाहेर जात असलात तरी, मी खात्रीने सांगू शकतो की, या वंडरवुमनचा बिग बॉसच्या घरातील प्रवास कोणीच विसरू शकणार नाही.”
दरम्यान, वर्षा यांनी घराचा निरोप घेतल्यामुळे आता ‘बिग बॉस’च्या ( Bigg Boss Marathi ) पाचव्या पर्वाचे सहा फायनलिस्ट निश्चित झाले आहेत. अभिजीत, अंकिता, सूरज, निक्की, धनंजय आणि जान्हवी या सहांमध्ये ट्रॉफी जिंकण्यासाठी अंतिम लढत होणार आहे. याशिवाय ‘बिग बॉस मराठी’चा महाअंतिम सोहळा ६ ऑक्टोबरला पार पडणार आहे.
