Suraj Chavan Kajal Shinde Video: बारामतीजवळच्या मोढवे गावातील रीलस्टार सूरज चव्हाण बिग बॉस मराठीच्या पाचव्या (Bigg Boss Marathi 5) पर्वाचा विजेता ठरला आहे. अत्यंत हलाखीच्या परिस्थितीत संघर्ष करून बिग बॉसचं विजेतेपद पटकावणारा सूरज चव्हाण ट्रॉफी घेऊन आता गावी पोहोचला आहे. गावी गेल्यावर त्याची भेट त्याच्या मैत्रिणीशी झाली. दोघांचा हा व्हिडीओ पाहून नेटकरी त्यांना लगन करण्याचा सल्ला देत आहेत.
सूरज चव्हाणच्या या मैत्रिणीचं नाव काजल शिंदे आहे. व्हिडीओत काजल सूरजला विचारते, ‘विसरलाय होय मला’. त्यावर सूरज नकार देतो. ‘तू माझी हिरोईन आहेस’, असं तो काजलला म्हणतो. त्यावर काजल म्हणाली, मला वाटलं की तू मला विसरलास, तितक्यात निक्की त्याची बहीण आहे असं कोणतरी बोलतं. त्यानंतर काजल सूरजचं अभिनंदन करते आणि असाच आयुष्यात पुढे जा म्हणते.
सूरज-काजलच्या व्हिडीओवर नेटकऱ्यांच्या कमेंट्स
‘अजूनही सूरजच्या पायात चप्पल नाहीये … कितीही मोठा झाला तरी त्याचे पाय जमिनीवरच आहेत अजून म्हणून सूरज महाराष्ट्राची पहिली पसंत आहे,’ ‘सूरज हीच ती आमची वहिनी शोभेल, तुला खरंच जिवापाड जपेल,’ ‘सूरज वेळ लावू नको करून टाक लग्न,’ ‘खरं तर सुरजला आता जो सिनेमा मिळालाय…. त्यात काजल हिरोईन पाहिजे….दोन्हीपण कॅरॅक्टर जबरदस्त आहेत,’ ‘काजल सूरजबरोबर लग्न कर त्याला तुझा आधार चांगला मिळेल,’ ‘तू अजून पुढे जा आणि जाताना तिला पण घेऊन जा,’ ‘सूरज हीच बायको म्हणून शोभेल तुला आणि सांभाळेल,’ अशा कमेंट्स यावर नेटकऱ्यांनी केल्या आहेत.
कोण आहे काजल शिंदे?
Who is Kajal Shinde: सूरजबरोबर व्हिडीओ शेअर करणारी काजल शिंदे ही कंटेंट क्रिएटर आहे. सूरज आणि काजलने यापूर्वी अनेक व्हिडीओ एकत्र शूट केले आहे. काजल व सूरज यांचे व्हिडीओ सोशल मीडियावर खूप लोकप्रिय आहेत.
सूरज चव्हाणचा बिग बॉसमधील प्रवास
सूरज चव्हाणला बिग बॉस मराठीमध्ये यायचं नव्हतं. त्याला वाटत होतं की त्याची फसवणूक केली जात आहे. मात्र चॅनलच्या लोकांनी त्याला विश्वासात घेतलं आणि शेवटी त्याने होकार दिला. त्यानंतर बिग बॉस मराठीच्या ७० दिवसांच्या प्रवासात सूरजने आपल्या साधेपणाने प्रेक्षकांची मनं जिंकली आणि नंतर तो बिग बॉसच्या ट्रॉफीचा विजेता ठरला. सूरजने शो जिंकल्यावर त्याला १४.६ लाख रुपये आणि इतर भेटवस्तू मिळाल्या. तसेच त्याची भविष्यात कुणीही आर्थिक फसवणूक करू नये त्यासाठी होस्ट रितेश देशमुखने त्याच्यासाठी मॅनेजरची व्यवस्था केली आहे.
सूरज चव्हाणचा चित्रपट
सूरज चव्हाण लवकरच ‘राजाराणी’ चित्रपटात दिसणार आहे. भारत गणेशपुरे, सुरेश विश्वकर्मा, माधवी जुवेकर, भक्ती चव्हाण, शिवाजी दोलताडे, तानाजी गालगुंडे यांच्याही या सिनेमात भूमिका आहेत. तसेच केदार शिंदे यांनी सूरजवर ‘झापूक झुपूक’ नावाचा सिनेमा काढण्याची घोषणा केली आहे.
