Bigg Boss: छोट्या पडद्यावरील लोकप्रिय आणि वादग्रस्त शो म्हणून ‘बिग बॉस’कडे पाहिलं जातं. ‘बिग बॉस’ हे परदेशातील ‘बिग ब्रदर’ या शोवर आधारित आहे. सुरुवातीला हिंदीमध्ये सुरू झालेलं ‘बिग बॉस’ आता कन्नड, बंगाली, तमिळ, तेलुगू, मराठी आणि मल्याळमसह सात भाषांमध्ये पाहायला मिळतं आहे.
हिंदी ‘बिग बॉस’चे आतापर्यंत १७ पर्व झाले आहेत. सध्या ‘बिग बॉस’चं १८वं पर्व सुरू आहे. या पर्वालादेखील प्रेक्षकांची चांगली पसंती मिळत आहे. आतापर्यंत राहूल रॉय, आशुतोष कौशिक, विंदू सिंह, श्वेता तिवारी, जुही परमार, उर्वशी ढोलकिया, गौहर खान, गौतम गुलाटी, प्रिन्स नरुला, मनवीर गुजर, शिल्पा शिंदे, दीपिका कक्कर, सिद्धार्थ शुक्ला, रुबिना दिलैक, तेजस्वी प्रकाश आणि एमसी स्टॅन यांनी हिंदी ‘बिग बॉस’ जिंकलं आहे. ‘बिग बॉसम’मध्ये सहभागी झालेल्या स्पर्धकांसाठी मोठी रक्कम मोजली जाते. पण, एक असा स्पर्धक आहे, ज्याच्या तीन दिवसांसाठी अडीच लाख रुपये मोजले होते.
आतापर्यंतच्या ‘बिग बॉस’मध्ये अनेक मोठे कलाकार येऊन गेले आहेत. मग सिद्धार्थ शुक्ला असो, हिना खान असो किंवा सध्या सुरू असलेल्या १८व्या पर्वातील विवियन डिसेना असो. प्रत्येकाने भलंमोठं मानधन घेतलं आहे. पण यांच्यापैकी कोणीही तीन दिवसांसाठी अडीच लाख रुपये घेतले नव्हते.
‘फायन्शियल एक्सप्रेस’च्या वृत्तानुसार, कॅनडा-अमेरिकेची अभिनेत्री पामेला एंडरसनने ‘बिग बॉस’मध्ये येण्यासाठी सर्वाधिक मानधन घेतलं होतं. पामेला ही ‘बिग बॉस’च्या इतिसाहातील सर्वाधिक मानधन घेणारी स्पर्धक आहे. तिला तीन दिवसांसाठी अडीच लाख रुपये मानधन दिलं होतं. ‘बिग बॉस’च्या चौथ्या पर्वात पामेला एंडरसन झळकली होती. या पर्वात सलमान खान पहिल्यांदाच होस्ट म्हणून पाहायला मिळाला होता.
दरम्यान, ‘बिग बॉस’च्या चौथ्या पर्वाची विजेती श्वेता तिवारी ठरली होती. या पर्वात ग्रेट खली, डॉली बिंद्रा आणि समीर सोनी पाहायला मिळाले होते. या पर्वातील द ग्रेट खलीने एका आठवड्यासाठी ५० लाख मानधन घेतलं होतं. तर करणवीर बोहराला एका आठवड्यासाठी २० लाख, सिद्धार्थ शुक्लाला ९ लाख, हिना खानला २ लाख आणि विवियन डिसेनाला ५ लाख मोजले आहेत.
© IE Online Media Services (P) Ltd