Colors Marathi New Serial : छोट्या पडद्याची लोकप्रियता दिवसेंदिवस वाढत चालली आहे. आता 'बिग बॉस मराठी' पाठोपाठ 'कलर्स मराठी' वाहिनीवर आणखी एक नवीन मालिका प्रेक्षकांच्या भेटीला येणार आहे. अवघ्या महाराष्ट्राची कुलस्वामिनी असलेल्या 'आई तुळजाभवानी'ची गाथा या नव्या मालिकेद्वारे प्रेक्षकांसमोर उलगडणार आहे. या मालिकेची पहिली झलक काही दिवसांपूर्वीच प्रेक्षकांच्या भेटीला आली होती. मात्र, यामध्ये प्रमुख भूमिका कोण साकारणार हे वाहिनीने उघड केलेलं नव्हतं. अखेर समोर आलेल्या प्रोमोमधून या मालिकेची प्रमुख नायिका कोण असेल हे आता सर्वांसमोर आली आहे. 'कलर्स मराठी वाहिनी'वर ( Colors Marathi ) आता लवकरच 'आई तुळजाभवानी' ही नवीन मालिका सुरू होणार आहे. या मालिकेचा प्रोमो वाहिनीच्या अधिकृत इन्स्टाग्राम पेजवर शेअर करण्यात आला आहे. "अत्याचार, विकृती, अधर्माचा विनाश करण्यासाठी आणि भक्तांच्या रक्षणासाठी, अवतरली अष्टभुजा आई तुळजाभवानी! अवघ्या महाराष्ट्राची कुलस्वामिनी, ‘आई तुळजाभवानी’, लवकरच आपल्या कलर्स मराठीवर…" असं या प्रोमोमध्ये सांगण्यात आलं आहे. हेही वाचा : Bigg Boss Marathi : शिवरायांचा जयघोष करत संग्राम चौगुलेची घरात एन्ट्री! आर्या लाजली, तर अरबाज-निक्की…; पाहा प्रोमो नेटकऱ्यांकडून कौतुक प्रोमोमधील जबरदस्त VFX, थरार, मांडणी या गोष्टी पाहून नेटकऱ्यांनी कमेंट्स सेक्शनमध्ये कौतुकाचा वर्षाव केला आहे. "खूपच भारी प्रोमो आहे… अभिनेत्री तर एवढी सुंदर आहे", "कमाल प्रोमो", "तुळजाभवानी आईचा इतिहास पाहायला नक्कीच आवडेल. जय भवानी जय शिवाजी", "जबरदस्त प्रोमो", "अंगावर काटा आला" अशा प्रतिक्रिया नेटकऱ्यांनी या प्रोमोवर केल्या आहेत. Colors Marathi ( कलर्स मराठी ) हेही वाचा : Video : देशमुखांची परंपरा! बाप्पाची इकोफ्रेंडली मूर्ती, घरातच विसर्जन अन्…; रितेशने मुलांना दिलेल्या संस्कारांचं सर्वत्र होतंय कौतुक 'आई तुळजाभवानी' या मालिकेत प्रमुख भूमिका कोण साकारणार याची प्रेक्षकांच्या मनात उत्सुकता निर्माण झाली होती. अखेर नव्या प्रोमोतून याचा उलगडा झाला आहे. 'आई तुळजाभवानी'ची भूमिका अभिनेत्री पूजा काळे साकारणार आहे. पूजा काळे ही भरतनाट्यम नृत्यांगना आहे. तसेच अभिनेत्रीने कथकचंही शिक्षण घेतलं आहे. या मालिकेच्या निमित्ताने पूजा आता मालिका विश्वात पदार्पण करण्यास सज्ज झाली आहे. दरम्यान, महाराष्ट्राची कुलस्वामिनी ‘आई तुळजाभवानी’ ही नवीन मालिका नेमकी केव्हा सुरू होणार याबाबत अद्याप कोणतीही माहिती समोर आलेली नाही. वाहिनीने ( Colors Marathi ) मालिकेच्या प्रदर्शनाची तारीख व अन्य कलाकारांची नावं गुलदस्त्यात ठेवली आहेत.
