‘दार उघड बये’ फेम अभिनेत्री लवकरच नव्या रुपात प्रेक्षकांच्या भेटीस येणार, पुण्यश्लोक अहिल्यादेवींची भूमिका साकारणार

अभिनेत्री सानिया चौधरीने सोशल मीडियावर काही तासांपूर्वी पोस्ट शेअर केली आहे. या पोस्टच्या माध्यमातून सानियाने लवकरच नव्या भूमिकेत दिसणार असल्याचं सांगितलं आहे. सानिया ‘पुण्यश्लोक’ या भव्य दिव्य महानाट्यात पुण्यश्लोक अहिल्यादेवींची भूमिका साकारणार आहे. याच नाटकाच पोस्टर शेअर करत सानियाने लिहिलं आहे, “महाशिवरात्रीच्या पवित्र दिवशी आज नवीन सुरुवात करत आहे. पुण्यश्लोक अहिल्यादेवींच्या ३००व्या जयंती निमित्त त्यांची व्यक्तिरेखा साकारायला मिळणं हे मी माझं भाग्य समजते.”

‘पुण्यश्लोक ‘हे महानाट्य लवकरच मराठी रंगभूमीवर येणार आहे. पुण्यश्लोक अहिल्यादेवी होळकर यांच्या त्रिशताब्दी जयंती वर्षा निमित्ताने सादर करत असलेल्या या महानाट्याचं दिग्दर्शन गणेश इनामदार यांनी केलं आहे. या महानाट्यात सानिया महत्त्वाच्या भूमिकेत झळकणार असल्यानिमित्ताने इतर कलाकार मंडळी आणि चाहते तिला शुभेच्छा देत आहेत.

दरम्यान, सानिया चौधरीच्या कामाबद्दल बोलायचं झालं तर, तिने ‘दार उघड बये’ आधी बऱ्याच मालिकांमध्ये काम केलं आहे. ‘स्टार प्रवाह’च्या ‘सांग तू आहेस का?’ या मालिकेत सानिया मुख्य भूमिकेत झळकली होती. या मालिकेत ती अभिनेता सिद्धार्थ चांदेकर, शिवानी रांगोळे यांच्याबरोबर झळकली होती. तसंच ‘साजणा’ या मालिकेत सानिया पाहायला मिळाली होती.