‘तारक मेहता का उल्टा चष्मा’ फेम अभिनेता गुरुचरण सिंग बेपत्ता होऊन काही आठवडे झाले आहेत. या प्रकरणी पोलीस २६ एप्रिलपासून त्याचा शोध घेत आहेत, पण अजूनपर्यंत कोणतीही माहिती समोर आलेली नाही. या प्रकरणात दिल्ली पोलीस वेगाने तपासचक्र फिरवत आतात ते मुंबईला पोहोचले आहेत. दिल्ली पोलिसांनी मुंबईतील ‘तारक मेहता का उल्टा चष्मा’ मालिकेच्या सेटला भेट दिली आहे. अहवालानुसार, गुरुचरणच्या संपर्कात असलेल्या सहकलाकारांची चौकशी करण्यात आली आहे.
पोलीस गुरुचरण सिंगचा शोध घेत आहेत, त्यासाठी ते त्याच्या संपर्कात असलेल्या लोकांची चौकशी करत आहेत. “या आठवड्यात दिल्ली पोलिसांनी आमच्या सेटला भेट दिली आणि गुरुचरण सिंगच्या संपर्कात असलेल्या कलाकारांची त्यांनी चौकशी केली. सर्वांनी पोलिसांना चांगले सहकार्य केले आहे. तसेच प्रोडक्शन हाऊसकडून गुरुचरण सिंगच्या मानधनाच्या थकबाकी संबंधित काही अफवा होत्या. परंतु, त्याचे सर्व पैसे आधीच देण्यात आले होते, असंही पोलिसांना सेटवर समजलं,” अशी माहिती न्यूज १८ ने एका सूत्राच्या हवाल्याने दिली आहे.
बेपत्ता गुरुचरण सिंगच्या आर्थिक परिस्थितीबद्दल त्याचे वडील म्हणाले, “माझं वय झालं आहे, त्यामुळे…”
‘तारक मेहता का उल्टा चष्मा’चे प्रॉडक्शन हेड सोहेल रमाणी यांनीही यांसंदर्भात प्रतिक्रिया दिली. “तपासाचा एक भाग म्हणून दिल्ली पोलिसांनी आमच्या सेटला भेट दिली होती. गुरुचरण सिंगची आमच्याकडे कोणतीही थकबाकी नाही, याबाबत आम्ही माहिती दिल्यावर ते परत गेले. आम्ही प्रार्थना करतोय की गुरुचरण सिंग सुखरुप असेल, तसेच तो लवकर सापडेल, अशी आम्हाला आशा आहे,” असं सोहेल रमाणी म्हणाले.
गुरुचरण सिंग २२ एप्रिलला दिल्लीहून मुंबईला येणार होता, त्यासाठी तो घरातून निघाला पण तो विमानतळावर गेला नाही आणि माघारी घरीही परतला नाही. त्यानंतर त्याच्या वडिलांनी २६ एप्रिल रोजी पोलिसांना तक्रार दिली. पोलिसांनी त्याचा शोध घेतला असता तो ई-रिक्षाने काही ठिकाणी जाताना दिसला. त्याने त्याचा फोनही दिल्लीतील पालम भागात सोडून दिला होता. पोलिसांनी त्याच्या बँक खात्याची तपासणी केली असता तो १० हून जास्त खाती वापरत होता अशी माहिती समोर आली. त्याशिवाय तो २७ ईमेल आयडी व दोन फोन वापरत होता. त्याने त्याच्या अकाउंटमधून १४ हजार रुपये काढले होते, त्यानंतर अकाउंटमधून कोणतेही व्यवहार झालेले नाही.