Bigg Boss Marathi Dhananjay Powar : कोल्हापूरचा लोकप्रिय रीलस्टार धनंजय पोवारने यंदा ‘बिग बॉस’चं पर्व प्रचंड गाजवलं. अचूक ग्रुपची निवड, गेमप्लॅन, सतत कॉमेडी, थट्टा-मस्करी करून संपूर्ण घराला हसत खेळत ठेवायचं या स्वभावाने महाराष्ट्राच्या तमाम प्रेक्षकांचं मन डीपीने जिंकून घेतलं. याशिवाय या घरात त्याला अंकिताच्या रुपात मानलेली बहीण भेटली. त्यामुळे सूरज असो किंवा अंकिता या सगळ्यांसाठी धनंजय घरचा ‘डीपी दादा’ झाला.
प्रेक्षकांना सुद्धा धनंजयचं ( Dhananjay Powar ) प्रत्येक सदस्याशी असलेलं बॉण्डिंग प्रचंड आवडलं. यामुळेच धनंजयला टॉप-४ च्या शर्यतीपर्यंत मजल मारता आली. खरंतर डीपीने घरात एन्ट्री केल्यावर तो इथवर पोहोचेल असं कोणालाच वाटलं नव्हतं मात्र, आपल्या खेळाने धनंजयने सर्वांचं मन जिंकून घेतलं. या ‘बिग बॉस’च्या घरात डीपीसाठी आणखी एक सकारात्मक गोष्ट घडली ती म्हणजे त्याचे बाबा खास इचलकरंजीहून त्याचं कौतुक करण्यासाठी मुंबईत आले होते.
धनंजय पोवार पोहोचला कोल्हापुरला
धनंजय ( Dhananjay Powar ) आणि त्याच्या बाबांमध्ये गेली अनेक वर्षे अबोला होता. बाबांनी आपलं कौतुक करावं अशी डीपीची अनेक वर्षांची इच्छा ‘बिग बॉस’मुळे पूर्ण झाली. फॅमिली वीकमध्ये घरात एन्ट्री घेतलेल्या बाबांना पाहून धनंजयला अश्रू अनावर झाले होते. आता हे पर्व संपल्यावर डीपी पहिल्यांदाच कोल्हापुरात पोहोचला आहे.
मुलगा घरी येणार म्हणून धनंजयच्या वडिलांनी सकाळपासून सर्व तयारी केली होती. आधी लेकावर विश्वास न ठेवणारे बाबा आज घरी परतणाऱ्या मुलाची आतुरतेने वाट पाहत होते. कोल्हापुरला पोहोचल्यावर सर्वप्रथम डीपीने जोतिबाचं दर्शन घेतलं आणि त्यानंतर इचलकरंजी येते त्याचं आगमन झाल्यावर त्याच्या चाहत्यांनी भव्य रॅली काढली. डीपीने ( Dhananjay Powar ) यावेळी सगळ्या चाहत्यांचे आभार मानले, सर्वांना अभिवादन करून फोटो काढले. याचे व्हिडीओ सध्या सोशल मीडियावर व्हायरल होत आहेत.
डीपीच्या चाहत्यांनी त्याच्यासाठी खास गाणं देखील तयार केलं होतं. हे गाणं मिरवणूकीत डीजेवर वाजवण्यात आलं. एकंदर त्याच्या स्वागतासाठी संपूर्ण कोल्हापूर नगरी सजल्याचं पाहायला मिळालं. धनंजय ट्रॉफी जिंकला नाही पण, त्याने आमचं मन जिंकलं अशा भावना त्याच्या चाहत्यांनी यावेळी व्यक्त केल्या.
