अंकिता वालावलकरने लग्नाचं निमंत्रण दिलं होतं का? निक्की तांबोळी म्हणाली, “तिने सुरुवातीला…”

‘बिग बॉस मराठी’च्या पाचव्या पर्वानंतर निक्की तांबोळी सध्या ‘सेलिब्रिटी मास्टरशेफ’मध्ये पाहायला मिळत आहे. या कार्यक्रमात ती विविध पदार्थ बनवून परीक्षकांची मनं जिंकताना दिसत आहे. निक्कीने नुकतीच एका वृत्तसंस्थेच्या पुरस्कार सोहळ्याला उपस्थिती लावली. यावेळी ती अंकिता वालावलकराच्या लग्नाबद्दल बोलली आणि तिला शुभेच्छा दिल्या.

निक्कीला विचारलं की, अंकिताने लग्नाला निमंत्रण दिलं होतं की नाही? यावर निक्की म्हणाली, “तिने सुरुवातीला मला संपर्क करण्याचा प्रयत्न केला होता. पण, मी माझ्या कामात इतकी व्यग्र होती की मला जमलंच नाही. परंतु, तिला माझ्या शुभेच्छा.”

पुढे निक्कीला आवडी-निवडी विचारण्यात आल्या. तिला सुरुवातीला विचारलं की, आवडता पदार्थ? तर निक्की म्हणाली, “सध्या मी ‘सेलिब्रिटी मास्टरशेफ’ करतेय. त्यामुळे खूप सारे आवडते पदार्थ आहेत. पण, करंजी मला खूप आवडते.” त्यानंतर आवडता अभिनेता आणि अभिनेत्री विचारलं. यावेळी निक्कीने रितेश देशमुखचं नाव घेतलं. तसंच निक्कीला ‘कल हो ना हो’ चित्रपट खूप आवडतो. याशिवाय तिचा स्वयंपाक करणं हा आवडता छंद असल्याचं तिने सांगितलं.

दरम्यान, अंकिता वालावलकरच्या लग्नसोहळ्याला १३ फेब्रुवारीपासून सुरुवात झाली होती. मेहंदी, साखरपुडा, संगीत, हळद आणि सप्तपदी असा समारंभपूर्वक लग्नसोहळा अंकिताचा पाहायला मिळाला. लग्नासाठी अंकिताने खास पिवळ्या रंगाची सुंदर साडी नेसली होती. तसंच अंकिताचा पती कुणालने मराठमोळा लूक केला होता. अत्यंत पारंपरिक पद्धतीने दोघांचा लग्नसोहळा पार पडला. अंकिता व कुणालच्या लग्नाला ‘बिग बॉस मराठी’च्या पाचव्या पर्वातील धनंजय पोवार, पंढरीनाथ कांबळे, पुरुषोत्तम दादा पाटील, निखिल दामले यांनी खास हजेरी लावली होती.