विशाल देवरुखकर दिग्दर्शित ‘बॉईज’ चित्रपटाचा पहिला भाग २०१७ मध्ये प्रेक्षकांच्या भेटीला आला होता. यानंतर २०१८ मध्ये दुसरा, २०२२ मध्ये तिसरा तर, गेल्यावर्षी २० ऑक्टोबरला ‘बॉईज ४’ चित्रपट प्रेक्षकांच्या भेटीला आला. विशाल देवरुखकर दिग्दर्शित ‘बॉईज ४’ चित्रपटाने बॉक्स ऑफिसवर चांगलं यश मिळवलं होतं. नुकतंच या चित्रपटाच्या टीमने रियुनियन केल्याचं पाहायला मिळालं. पण, ही भेट काहीशा हटके अंदाजात आहे.
‘बॉईज ४’ चित्रपटाची संपूर्ण टीम नुकतीच एकत्र फिरायला गेली होती. यावेळी या सगळ्या कलाकारांनी एकत्र मिळून कल्ला केल्याचं पाहायला मिळालं. एवढंच नाहीतर “निशाणा तुला दिसला ना…” हे जुनं गाणं सध्या सोशल मीडियावर ट्रेंड होत आहे आणि या गाण्यावर नेटकरी विशिष्ट अशा हूकस्टेप्स करत आहेत. या स्टेप्स जशाच्या तशा फॉलो करत ‘बॉईज ४’ चित्रपटाच्या टीमने स्विमिंग पूलमध्ये जबरदस्त डान्स केला.
‘महाराष्ट्राची हास्यजत्रा’ फेम अभिनेता निखिल बनेने याचा खास व्हिडीओ इन्स्टाग्रामवर शेअर केला आहे. यामध्ये हे सगळे कलाकार मिळून एकत्र डान्स करत असल्याचं पाहायला मिळत आहे. “‘बॉईज ४’च्या टीमबरोबर निशाणा…” असं कॅप्शन निखिलने हा व्हिडीओ शेअर करत दिलं आहे. यामध्ये पार्थ भालेराव, गौरव मोरे, सुमंत शिंदे यांची देखील झलक पाहायला मिळत आहे. ‘बॉईज’ चित्रपटाच्या टीमचं हे ऑफस्क्रीन बॉण्डिंग पाहून नेटकऱ्यांनी या व्हिडीओवर कौतुकाचा वर्षाव केला आहे.
निखिल बनेने शेअर केलेल्या व्हिडीओमध्ये एकूण १६ जण मिळून “निशाणा तुला दिसला ना…” या गाण्यावर थिरकले आहेत. गौरव मोरे या व्हिडीओमध्ये डाव्या कोपऱ्यात डान्स करत असल्याने सुरुवातीला काही नेटकऱ्यांना तो पटकन दिसला नाही. त्यामुळे या व्हिडीओवर काही जणांनी “गौरव सर खूप शोधावं लागलं” अशा प्रतिक्रिया दिल्या आहेत. तर, अन्य काही युजर्सनी निखिलच्या या व्हिडीओवर “क्या बात हैं…”, “तुम्ही किती भारी आहात राव”, “सगळ्यात भारी तो श्वान भाव खाऊन गेला” अशा कमेंट्स निखिल व गौरवचा हा डान्स व्हिडीओ पाहून केल्या आहेत.
हेही वाचा : ठरलं तर मग : पूर्णा आजीने सायलीचा केला स्वीकार! अखेर ‘तो’ भावनिक क्षण आलाच, नातसुनेवर सोपवली मोठी जबाबदारी
दरम्यान, गौरव मोरे आणि निखिल बनेचे चाहते त्यांना भविष्यात विविध भूमिकांमध्ये पाहण्यासाठी उत्सुक आहेत. निखिल सध्या ‘महाराष्ट्राची हास्यजत्रा’मधून प्रेक्षकांचं मनोरंजन करत आहे. तर, गौरव मोरेने काही दिवसांपूर्वीच या शोमधून प्रेक्षकांचा निरोप घेतला. नुकताच त्याचा ‘अल्याड पल्याड’ चित्रपट प्रदर्शित झाला असून याला प्रेक्षकांकडून चांगला प्रतिसाद मिळाला आहे.
