Kush Shah left Taarak Mehta Ka Ooltah Chasmah : ‘तारक मेहता का उल्टा चष्मा’ ही टीव्हीवरील विनोदी मालिका सुरू होऊन १६ वर्षे झाली आहेत. हा शो अजूनही प्रेक्षकांचे मनोरंजन करत आहे, पण इतक्या वर्षांत अनेक कलाकारांनी शो सोडला आहे. काहींनी वादांमुळे हा शो सोडण्याचा निर्णय घेतला, तर काहींनी इतर कारणांमुळे शोला अलविदा म्हटलं. आता आणखी एका कलाकाराने शो सोडल्याची बातमी समोर आली आहे. ‘गोली’ची भूमिका साकारणाऱ्या कुश शाहने आता ‘तारक मेहता का उल्टा चष्मा’तून निरोप घेतला आहे.
आतापर्यंत दिशा वकानी (Disha Vakani), शैलेष लोढा, जेनिफर मिस्त्री, गुरुचरण सिंगसह काही कलाकारांनी हा शो सोडला. त्यानंतर कुश शाह हा शो सोडणार असल्याच्या बातम्या बऱ्याच दिवसांपासून येत होत्या, मात्र त्याने हे वृत्त फेटाळले होते व या फक्त अफवा असल्याचं म्हटलं होतं. पण आता स्वतः कुशनेच हा शो सोडल्याची माहिती एक व्हिडीओ शेअर करत चाहत्यांना दिली आहे.
कुशने मानले निर्मात्यांचे आभार
व्हिडीओमध्ये कुश म्हणतो, “जेव्हा हा शो सुरू झाला, तेव्हा तुम्ही आणि मी पहिल्यांदा भेटलो होतो, मी खूप लहान होतो. तेव्हापासून तुम्ही मला खूप प्रेम दिले. तुम्ही मला जेवढे प्रेम दिले आहे तेवढेच प्रेम या कुटुंबाने मला दिले आहे. माझ्या इथे खूप आठवणी आहेत. इथे काम करताना खूप मजा आली. मी माझे बालपण इथे घालवले आहे. मी तारक मेहता का उल्टा चष्माचे निर्माते असित कुमार मोदी यांचे आभार मानू इच्छितो. त्यांनी माझ्यावर खूप विश्वास दाखवला, माझे पात्र खूप मनोरंजक बनवले आणि मला नेहमीच प्रेरित केले. त्यांच्या विश्वासामुळेच कुश ‘गोली’ बनू शकला.”
शोच्या टीमबरोबर केक कापतानाचे कुशचे (Kush Shah Farewell Video) व्हिडीओ व फोटोही समोर आले आहेत. ज्यामध्ये तो असित मोदींना केकही भरवताना दिसत आहे. यावेळी कुशचे असित मोदींनी कौतुक केलं. कुश लहानपणापासूनच गोकुलधाम सोसायटीचा एक भाग आहे आणि त्याने त्याचे पात्र खूप चांगले वठवले आहे. हे ऐकून कुश भावुक झाला.
कुश चाहत्यांना म्हणाला…
“मी या शोला निरोप देतोय मात्र तुमचे प्रेम कायम आठवणीत राहील. पण हो, फक्त मी, कुश शाह या शोचा निरोप घेत आहे. तुमचा गोली तसाच राहील. तोच आनंद, तेच हास्य व तीच मस्ती. या शोमध्ये अभिनेता बदलू शकतो, पण पात्र नाही,” असं कुश चाहत्यांना म्हणाला.
