झी मराठी वाहिनीवरील ‘तू तेव्हा तशी’ मालिका सध्या चर्चेत आहे. अल्पावधीतच ही मालिका प्रेक्षकांच्या पसंतीस पडली. आता लवकरच ‘तू तेव्हा तशी’ मालिका प्रेक्षकांचा निरोप घेणार आहे. या मालिकेमधील अनामिका हे पात्र साकारणारी अभिनेत्री शिल्पा तुळसकरने तर प्रेक्षकांच्या मनात घर केलं. सध्या या मालिकेमधुळे ती चर्चेत आहे. शिवाय आज शिल्पाचा वाढदिवसही आहे. याचनिमित्त तिच्या काही खास गोष्टींबाबत आपण जाणून घेणार आहोत.
आणखी वाचा – Video : ४५ वर्षांची मैत्री तुटली! सतीश कौशिक यांच्या पार्थिवाजवळ बसून ढसाढसा रडले अनुपम खेर, व्हिडीओ व्हायरल
शिल्पाने मध्यंतरी दिलेल्या एका मुलाखतीमध्ये तिच्या खासगी आयुष्याबाबत खुलासा केला होता. शिल्पाचा प्रेमविवाह झाला आहे. शिल्पा म्हणाली, “फिल्म इन्स्टीट्युटची एक डिप्लोमा फिल्म मी केली होती. तेव्हा मी महाविद्यालयामध्ये शिक्षण घेत होते. मला महाविद्यालयामधील कोणता मित्र आवडला नाही. पण या क्षेत्रामध्ये खूप कमी लोकांकडे पाहून मला असं वाटलं की यांच्याशी लग्न झालं असतं तर मला आवडलं असतं”.
“फिल्म इन्स्टीट्युटची डिप्लोमा फिल्म जेव्हा मी करत होते तेव्हा तिथला डीओपी मला खूप आवडला होता. त्याने चित्रीकरणादरम्यान लावलेली प्रत्येक फ्रेम छान दिसत होती. त्या फ्रेमध्येच मी होते. मीही सुंदर दिसत होते. एक गोंधळ तेव्हा मी घातला. त्या डीओपीची व माझी छान मैत्री झाली होती”.
पुढे शिल्पा म्हणाली, “मला कळलं होतं की त्याला मी आवडत आहे. मलाही तो आवडायचा. पण हे मी त्याला सांगितलं नाही. कारण मला बॉयफ्रेंड होता. मी कोणाला तरी डेट करत आहे हेही मी त्याला सांगितलं नाही. कारण मला ती मैत्री गमवायची नव्हती. पण शेवटी एक वेळ अशी आली की त्यानेच मला प्रपोज केलं. त्यावेळी माझा बॉयफ्रेंड आहे हे मला त्याला सांगावं लागलं. तेव्हा आमची मैत्री तुटली. त्यानंतर अनेक वर्षांनी आम्ही पुन्हा याच क्षेत्रात काम करत असताना भेटलो. आम्ही जेव्हा भेटलो तेव्हा खूप गंमतीने या विषयावर बोललो. पण मी त्याचं मन तेव्हा दुखावलं. आजही मला त्या गोष्टीचं दुःख वाटतं”. शिल्पाने तिच्या खासगी आयुष्याबाबत पहिल्यांदाच उघडपणे भाष्य केलं.
