‘ये रिश्ता क्या कहलाता है’ फेम हिना खान गेल्या काही दिवसांपासून तिच्या वैयक्तिक आयुष्यामुळे चर्चेत आहे. हिना खानला तिसऱ्या टप्प्यातील स्तनांचा कर्करोग झाला आहे. याबाबत काही दिवसांपूर्वी हिनाने तिच्या इन्स्टाग्राम अकाउंटवर एक पोस्ट शेअर करीत माहिती दिली.
हिना या आजाराशी झुंज देत असून, तिनं यावरील उपचार आधीच सुरू केले आहेत. केमोथेरिपी घेतल्यानंतर आता हिना खानने एक नवीन पोस्ट चाहत्यांबरोबर शेअर केली आहे. या पोस्टमध्ये अभिनेत्रीने केमो घेतल्यानंतरचे काही फोटो तिच्या सोशल मीडियावर शेअर केले आहेत. या फोटोत हिनाने स्वत:चे सेल्फी शेअर केले आहेत. या फोटोमध्ये हिनाच्या मानेखाली आणि शरीराच्या काही भागांवर डाग आणि जखमा झालेल्या दिसतायत.
केमोसाठी हिनाने आधीच आपले केस कापले होते. या कठिण काळातदेखील हिना अगदी हसत सगळ्या गोष्टींना सामोरं जाताना दिसतेय. या फोटोला कॅप्शन देत हिनाने चाहत्यांना विचारलं, “या फोटोत तुम्हाला काय दिसतंय? माझ्या अंगावरचे डाग की डोळ्यातील आशा?”
हिना पुढे म्हणाली, “हे डाग माझे आहेत, मी त्यांना प्रेमाने जपते. कारण- हे डाग माझ्या या आजारातील प्रगतीचं चिन्ह आहे. माझ्या डोळ्यातील आशा माझ्या आत्म्याचे प्रतिबिंब आहे, या डोळ्यांनी माझ्या आयुष्यात शेवटपर्यंत मी सकारात्मकतेचा प्रकाश पाहू शकतेय. मी माझ्या उपचारांबद्दल सकारात्मक विचार करतेय आणि मी तुमच्यासाठीदेखील प्रार्थना करतेय.”
हिनाने शेअर केलेला हा फोटो सध्या सोशल मीडियावर तुफान व्हायरल होतोय. अनेक कलाकारांनी हिनाच्या या पोस्टवर कमेंट केल्या आहेत. प्रसिद्ध फॅशन डिझायनर आणि अभिनेत्री मसाबा गुप्ताने “तू तुझी काळजी घे हिना” अशी कमेंट केली आहे. तर मोना सिगंने कमेंट करत लिहिलं, “तू एक योद्धा आहेस हिना. तुझ्या आयुष्यातील हा टप्पादेखील लवकरच निघून जाईल.” तर अर्जुन बिजलानी, आरती सिंग, जुही परमार अशा अनेक कलाकारांनी कमेंट केली आहे.
दरम्यान, ‘ये रिश्ता क्या कहलाता है’ या मालिकेध्ये अक्षराची भूमिका साकारून हिना खानने प्रसिद्धी मिळवली. ‘बिग बॉस’ आणि ‘खतरों के खिलाडी’ सारख्या टीव्ही शोमध्येही ती स्पर्धक म्हणून ती सहभागी झाली होती.
