चित्रपट, नाटक आणि मालिका यामध्ये विविध भूमिका साकारत प्रेक्षकांचे भरभरून मनोरंजन करणाऱ्या अभिनेत्री म्हणजे लीना भागवत या होय. त्या सातत्याने कोणत्या ना कोणत्या माध्यमातून प्रेक्षकांच्या भेटीला येत असतात. आता मात्र एका मुलाखतीत त्यांनी त्यांच्या लहानपणीचा एक मजेशीर किस्सा सांगितल्याने त्या चर्चेत आल्या आहेत.
काय म्हणाल्या लीना भागवत?
अभिनेत्री लीना भागवत यांनी ‘व्हायफळ’ या यूट्यूब चॅनेलला मुलाखत दिली. त्यावेळी अभिनेत्री लीना भागवत यांनी त्यांच्या शाळेतील एक मजेशीर किस्सा सांगितला आहे. लीना भागवत यांनी म्हटले, “नंबरनुसार मी बऱ्याचदा मॉनिटर झाले आहे, पण जबाबदारी दिली आहे तर आपण ते काम करूया असं होतं. निबंध आणि वत्कृत्व स्पर्धेत मी भाग घ्यायचे. तेव्हा माहीत नव्हतं की हे सगळे कलागुण नंतर आपल्याला आयुष्यात उपयोगी पडणार आहेत.”
“मला आठवत नाही की मी कधी सरळ उभी राहून एखादी कविता म्हटली आहे. मला हातवारे करत कविता म्हणायला इतकी आवडायची की, बाई मला सांगायच्या की लीना तू कविता म्हण. मग मी कविता म्हणणार. मला आठवतंय चांदोबाला आईने मारली थप्पड अशी ओळ त्या कवितेत होती. ते म्हणताना मी स्वत:ला इतक्या जोरात मारून घेतलं होतं. बरं वर्गात मारून घेतलं तेव्हा काहीच नाही, मी घरी येऊन रडले; तर आई म्हणाली काय झालं? मी म्हटलं मारलं. तर आई म्हणाली कोणी मारलं तुला? मी म्हटलं, कोणी नाही मीच स्वत:ला मारलं. कदाचित तो माझा पहिला धडा होता की अभिनय हा नेहमी आभासी असतो. कविता म्हणायला आवडायचं मला, ३० पर्यंत पाढे पाठ होते”, अशी आठवण अभिनेत्री लीना भागवत यांनी सांगितली आहे. याबरोबरच लहानपणी मी खूप खोड्या काढायचे, उनाडक्या करायचे, घरी तक्रारी घेऊन यायचे, अशी आठवणदेखील त्यांनी सांगितली आहे.
दरम्यान, ‘होणार सून मी या घरची’ या मालिकेत त्यांनी शरयूची भूमिका साकारली होती. त्यांची ही भूमिका प्रेक्षकांना आवडली असल्याचे पाहायला मिळाले. शशांक केतकर आणि तेजश्री प्रधान यांची मुख्य भूमिका असलेल्या मालिकेला मोठी लोकप्रियता मिळाली होती. लीना भागवत चित्रपट, मालिका, नाटक या माध्यमातून प्रेक्षकांचे मनोरंजन करताना दिसतात.
© IE Online Media Services (P) Ltd