तेजश्री प्रधान व राज हंचनाळे यांची प्रमुख भूमिका असलेली ‘प्रेमाची गोष्ट’ मालिका ४ सप्टेंबरपासून सुरू झाली. पण या मालिकेने अल्पावधीत प्रेक्षकांच्या मनात अटळ स्थान निर्माण केलं. दोन विरोधी स्वभावाचे मुक्ता-सागर आणि त्यांचे कुटुंब कसे एकत्र आले हे आतापर्यंत पाहायला मिळालं. पण आता चिमुकल्या सईवरच्या प्रेमापोटी मुक्ता-सागर बोहल्यावर चढणार असून लवकरच दोघं लग्नबंधनात अडकणार आहेत. दोघांमधील प्रेम कसं बहरत हे आता पुढे पाहायला मिळणार आहे. त्यामुळे सध्या दोघांचा लग्नसोहळा थाटामाटात सुरू आहे.
‘प्रेमाची गोष्ट’ मालिकेच्या आजच्या भागात उर्वरित संगीत सोहळा पाहायला मिळणार आहे. यामध्ये दोन गटांमध्ये डान्सची जुगलबंदी होणार आहे. ‘मन धागा धागा जोडते नवा’ मालिकेतील आनंदी-सार्थक, ‘पिंकीचा विजय असो’मधील पिंकी-युवराज, तसेच सई, मुक्ता-सागरचा डान्स पाहायला मिळणार आहे. या संगीत सोहळ्यानंतर मुक्ता-सागरचा हळद, सप्तपदीचा समारंभ मोठ्या दिमाखात होणार आहे. सप्तपदीच्या समारंभसाठी खास ‘ठरलं तर मग’ मालिकेत सायली-अर्जुन हजेरी लावणार आहे. यावेळी दोन्ही जोडप्यांमध्ये खास नातं दाखवलं जाणार आहे.
नुकताच सायली-अर्जुन म्हणजेच अभिनेत्री जुई गडकरी आणि अमित भानुशाली यांनी ‘लोकमत फिल्मी’ या एंटरटेनमेंट युट्यूब चॅनेलशी संवाद साधला. यावेळी सायली-अर्जुनने ‘प्रेमाची गोष्ट’ मालिकेत मुक्ता-सागरबरोबर कोणतं नातं दाखवलं जाणार? याचा खुलासा केला. यावेळी अर्जुन (अमित) म्हणाला, “मी सागरचा एक खास मित्र म्हणून लग्नाला आलो आहे. तसेच सायली ही मुक्ताची खूप जवळची मैत्रिण आहे. पुढे सायली (जुई) म्हणाली, “मुक्ता माझ्या आश्रमातल्या मुलांवर मोफत उपचार करायची. त्यामुळे मी तिला शुभेच्छा देण्याबरोबर तिचे आभार मानले. मी म्हणाले, खरं खूप थँक्यू. कारण तू माझ्या मुलांवर प्रेमाने उपचार केले.”
हेही वाचा – Premachi Goshta: “नौका घेऊन निघालो दर्याकाठी…”, मुक्ता-सागरने एकमेकांसाठी घेतले भन्नाट उखाणे
पुढे जुई लग्नातल्या सीनविषयी म्हणाली, “मला वाटलं, हाय, हॅलो, लग्नाचा शुभेच्छा एवढं करायचं असेल. पण चांगली गोष्ट म्हणजे त्यांनी आम्हाला या कथेमध्ये सामावून घेतलं. आम्ही प्रॉपर सीन केलेत. मुक्ताचा आणि माझा भलामोठा सीन झालाय.”
