Bigg Boss 18: ‘बिग बॉस’च्या १८व्या पर्वातील सध्या चर्चेत असणारी सदस्य म्हणजे चाहत पांडे. चाहतच्या रिलेशनशिपबाबत चर्चांना उधाण आलं आहे. वीकेंडच्या वारला सलमान खानने चाहतचा एक फोटो दाखवला. तेव्हापासून चाहतच्या रिलेशनशिपविषयी बोललं जात आहे. चाहत एका गुजराती मुलाला डेट करत असल्याचं म्हटलं जात आहे. पण, अभिनेत्रीने सलमान समोर बॉयफ्रेंड नसल्याची कबुली दिली आहे. तरीही सोशल मीडियावर चाहतचे अनेक व्हिडीओ व्हायरल झाले आहेत. यावरूनच आता करणवीर मेहराने चाहतला डिवचल्याचं समोर आलं आहे.
‘कलर्स टीव्ही’च्या सोशल मीडियावर नुकताच ‘बिग बॉस’च्या १८व्या पर्वाचा एक प्रोमो शेअर करण्यात आला आहे. ज्यामध्ये करणवीर मेहरा चाहताला रिलेशनशिपवरून टोमणे मारताना दिसत आहे. पण, यावरून चाहतचा पारा चढतो आणि ती भांडी फेकते. त्यानंतर ती रडताना दिसत आहे. नेमकं काय घडलं? जाणून घ्या…
हेही वाचा – Bigg Boss 18: “हीच तोंडपण बघायचं नाही…”, घराबाहेर येताच कशिश कपूरची शिल्पा शिरोडकरवर टीका, म्हणाली…
प्रोमोमध्ये चाहत शिल्पाला सांगतेय की, खूप काही कमवलंय. पण ती घाम गाळून केलेली कमाई आहे. त्यानंतर करणवीर विचारतो, तुझ्याकडे इतकं काम होतं. तर तुला अ‍ॅनिव्हर्सरी साजरी करायला कसा वेळ मिळाला? तेव्हा चाहत म्हणाली, “तू याची काळजी करू नकोस.” मग करण मिश्किलपणे हसला.
त्यानंतर चाहत करणला म्हणते की, मेहरा मी उत्तर देऊ शकत नाही. पण मी बरंच काही बोलू शकते. पुढे चाहतचा राग अनावर होतो आणि ती समोर असलेली भांडी करणच्या अंगावर फेकताना दिसत आहे. ती करणला इथून निघून जा असं बोलते आणि नंतर एकट्यात रडताना पाहायला मिळत आहे.
चाहत आणि करणच्या या प्रोमोवर नेटकऱ्यांच्या प्रतिक्रियांचा पाऊस पडला आहे. अनेकांनी करणला ट्रोल करून चाहतला पाठिंबा दिला आहे. “करण तुला लाज वाटली पाहिजे”, “करण ट्रॉफी जिंकण्यास पात्र नाही”, “चाहत पांडेला पूर्ण पाठिंबा आहे”, “जबरदस्त चाहत”, “अतिआत्मविश्वासू करण”, अशाप्रकारच्या नेटकऱ्यांच्या प्रतिक्रिया उमटल्या आहेत.
दरम्यान, गेल्या आठवड्यात ‘बिग बॉस’च्या घरातून कशिश कपूर बाहेर झाली. त्यामुळे आता घरात फक्त ९ सदस्य बाकी राहिले आहेत. या सदस्यांमधून कोण-कोण महाअंतिम फेरीपर्यंत पोहोचतंय? हे पाहणं महत्त्वाचं असणार आहे.
