‘कौन बनेगा करोडपती’ हा कार्यक्रम देशभरात पाहिला जातो. १५ वा सीझन संपल्यानंतर जवळजवळ आठ महिन्यांनंतर १६ वा सीझन प्रेक्षकांच्या भेटीला आला आहे. १२ ऑगस्ट २०२४ ला १६ व्या पर्वाचा पहिला भाग ‘सोनी टीव्ही’ वाहिनीवर प्रदर्शित झाला आहे.
‘कौन बनेगा करोडपती’ या कार्यक्रमाचे सूत्रसंचालन वर्षानुवर्षे बॉलीवूडचे दिग्गज अभिनेते अमिताभ बच्चन करत आहेत. याबद्दल बोलताना बीग बी यांनी म्हटले, ‘कौन बनेगा करोडपती’ हा कार्यक्रम एका खेळापेक्षा जास्त आहे. जो व्यक्ती हा खेळ खेळण्यासाठी समोरच्या खुर्चीवर बसलेला असतो, त्याच्या स्वप्न आणि आशा-आकांक्षेचा प्रवास असतो. ‘कौन बनेगा करोडपती’ या शोचे सूत्रसंचालन करताना मी माझ्या चाहत्यांशी जोडलेला राहतो. हे चाहते म्हणजे माझे विस्तारित कुटुंब आहे.”
पुढे बोलताना त्यांनी म्हटले की, या कार्यक्रमाच्या १६ व्या सीझनमध्ये आधुनिक भारताचे प्रतिबिंब आढळेल. ज्ञानाची पातळी वाढवणारा म्हणून आपण हा सीझन साजरा करणार आहोत. हा कार्यक्रम पाहताना दर्शकांना उत्तम अनुभव येईल असे त्यांनी म्हटले आहे. अशी माहिती न्यूज एजन्सी ‘आयएएनएस’ ने दिली आहे.
‘कौन बनेगा करोडपती’च्या सीझन १६ मध्ये काय नवीन असणार?
‘कौन बनेगा करोडपती’च्या १६ व्या पर्वात काही नवीन गोष्टींचा समावेश केला आहे. ‘सुपर ट्विस्ट’ हा सेगमेंट या पर्वात पाहायला मिळणार आहे. याबरोबरच, ‘दुग्नास्त्र’ या संकल्पनेचादेखील समावेश केला आहे. याचाच अर्थ स्पर्धकाने जिंकलेली रक्कम ही दुप्पट होणार आहे.
‘सुपर सवाल’ या संकल्पनेचादेखील या पर्वात समावेश केला आहे. जेव्हा स्पर्धक यशस्वीरित्या पहिल्या पाच प्रश्नांची उत्तरे देईल, तेव्हा त्याला सुपर सवाल हा बोनस प्रश्न विचारण्यात येईल. महत्त्वाचे म्हणजे, या प्रश्नासाठी स्पर्धकापुढे कोणतेही पर्याय नसतील आणि कोणतीही लाइफलाइनदेखील वापरता येणार नाही.
जर स्पर्धकाने या प्रश्नाचे बरोबर उत्तर दिले तर त्याला ‘दुग्नास्त्र’ चा वापर करता येणार आहे. या दुग्नास्त्राचा वापर करून खेळाच्या दुसऱ्या टप्प्यात म्हणजेच प्रश्नक्रमांक सहा ते प्रश्नक्रमांक दहा यामध्ये एका विशिष्ट प्रश्नाची रक्कम दुप्पट करू शकतात. जर हे यशस्वी झाले, तर खेळाच्या शेवटी ही बोनस रक्कम जिंकलेल्या रकमेत जोडली जाईल.
दरम्यान, ३ जुलै २००० मध्ये ‘कौन बनेगा करोडपती’चे पहिले पर्व प्रेक्षकांच्या भेटीला आले होते. महत्त्वाचे म्हणजे पहिल्या सीझनपासून अमिताभ बच्चन या शोचे सूत्रसंचालन करत आहेत. आता या पर्वामध्ये अनेक गोष्टी बदलल्याने केबीसीच्या खेळात काय घडणार हे पाहणे महत्त्वाचे ठरणार आहे.
