‘आई कुठे काय करते’ ही छोट्या पडद्यावरील अत्यंत लोकप्रिय मालिका आहे. या मालिकेची कथा, संवाद, सर्व कलाकारांचा अभिनय प्रेक्षकांना खूप आवडतो. या मालिकेचा प्रेक्षकवर्ग खूप मोठा आहे. या मालिकेतील प्रत्येक कलाकारावर प्रेक्षक भरभरून प्रेम करताना दिसतात. तर आता या मालिकेत एक नवं वळण येणार आहे.
‘आई कुठे काय करते’ या मालिकेत नेहमीच नवनवीन ट्विस्ट अँड टर्न्स येताना दिसतात. काही दिवसांपूर्वीच या मालिकेमध्ये अरुंधती आणि आशुतोषचा विवाह सोहळा संपन्न झाला. तर आता देशमुख कुटुंबात ईशाच्या साखरपुड्याची तयारी सुरू आहे. आता अशातच या मालिकेमध्ये आशुतोषची बहीण वीणाची एन्ट्री होणार आहे. वीणा ही आशुतोषची आत्येबहीण आहे. ही भूमिका अभिनेत्री खुशबू तावडे साकारताना दिसणार आहे.
खुशबूने नुकतीच तिच्या सोशल मीडिया अकाउंटवर या मालिकेच्या सेटवरील तिचे काही फोटो पोस्ट करून तिच्या चाहत्यांना ही आनंदाची बातमी दिली. गरोदरपणामुळे काही महिन्यांपूर्वी तिने कामातून ब्रेक घेतला होता. तर आता या मालिकेच्या माध्यमातून ती मोठ्या ब्रेकनंतर टेलिव्हिजनवर पुनरागमन करणार आहे. या मालिकेच्या सेटवरील फोटो पोस्ट करत तिने लिहिलं, “नवीन… वीणा. ‘आई कुठे काय करते!’ १३ मेपासून.”
आता तिची ही पोस्ट सोशल मीडियावर चांगलीच चर्चेत आली आहे. ती आता या मालिकेत दिसणार असल्याने तिचे चाहते तिला पाहण्यासाठी खूप उत्सुक झाले आहेत. त्यांची उत्सुकता त्या पोस्टवर कमेंट करत दाखवत आहेत. एका नेटकऱ्याने लिहिलं, “मी हा फोटो आणि ही बॅकग्राऊंड पाहूनच ओळखलं की, तुम्हीच वीणा असाल. या भूमिकेसाठी खूप खूप शुभेच्छा.” तर आणखी एक नेटकरी म्हणाला, “अखेर तू स्टार प्रवाहवर पुनरागमन केलंस… मला याच चॅनेलवर तुला आणखीन नव्या भूमिकेत पाहायला आवडेल. तुला खूप साऱ्या शुभेच्छा.” तिच्या चाहत्यांबरोबरच मनोरंजनसृष्टीतील तिच्या मित्रमंडळींनीही तिच्या या पोस्टवर कमेंट करत तिला शुभेच्छा देत तिचं अभिनंदन केलं आहे.
