‘बिग बॉस मराठी’च्या चौथ्या पर्वाची सर्वाधिक चर्चा रंगली. अक्षय केळकर या पर्वाचा विजेता ठरला. पण त्याचबरोबरीने ‘बिग बॉस’च्या घरातील काही सदस्य चर्चेचा विषय ठरले. त्यातीलच एक सदस्य म्हणजे किरण माने. किरण यांनी उत्तम खेळी खेळत टॉप तीनमध्ये स्थान मिळवलं. थोडक्यात ते ‘बिग बॉस’च्या ट्रॉफीपासून दूर राहिले. आता त्यांनी शेअर केलेला एक व्हिडीओ सोशल मीडियावर चर्चेचा विषय ठरत आहे.
आणखी वाचा – द्विशतक झळकावणाऱ्या शुबमन गिलच्या अफेअरच्या चर्चा, बॉलिवूडच्या सुप्रसिद्ध अभिनेत्याच्या लेकीला करतोय डेट?
‘बिग बॉस मराठी’च्या घरामध्ये प्रवेश करताना किरण मानेंची ओळख सांगणारा एक व्हिडीओ या शोमध्ये दाखवण्यात आला. तोच व्हिडीओ त्यांनी फेसबुक अकाऊंटद्वारे शेअर केला आहे. तसेच हा व्हिडीओ पुन्हा पाहिल्यानंतर किरण यांना स्वतःचा अभिमान वाटत आहे. त्यांनी या व्हिडीओबरोबर खास पोस्ट लिहिली आहे.
किरण म्हणाले, “आग्ग्गाय्याय्यायाया… काय भन्नाट बनवलाय राव ह्यो व्हिडीओ. नादखुळा…पयल्या दिवशी बिग बॉसच्या घरात जाताना महेश मांजरेकरांनी खतरनाक ओळख करुन देत ह्यो सुरु केला आन् अंगावर काटा आला भावांनो…शंभर हत्तींचं बळ आलं. कलर्स मराठीमधल्या ज्यांनी कुनी यासाठी कष्ट घेतले त्या सगळ्यांना कडकडीत सलाम!”
“जे बोललो ते करूनच बाहेर आलो. खेळातला समदा विरोध झुगारुन शंभर दिवस खनखनखनखनखन नाणं वाजवलं. होती नव्हती ती सगळी ताकद लावली. कशाची पर्वा न करता खरंखुरं वागलो. नो आडपडदा. काय हुईल ते हुईल. पन जे हाय ते हाय! बाहेर तुम्हा सगळ्यांची मनं जिंकू शकलो. भरुन पावलो. आल्यापास्नं अख्ख्या महाराष्ट्रातनं प्रेमाचा, मायेचा वर्षाव चाल्लाय. लोक घर शोधत येतायत. हारफुलांनी घर भरुन गेलंय. अजून काय पायजे भावांनो? आनंदाचे डोही आनंद तरंग…” किरण मानेंनी शेअर केलेल्या व्हिडीओला नेटकऱ्यांचाही उत्तम प्रतिसाद मिळत आहे. तसेच कमेंट्सच्या माध्यमातून नेटकऱ्यांनी किरण मानेंचं कौतुक केलं आहे.
