कुशल बद्रिकेच्या मित्राला मिळाला ‘झी चित्र गौरव’मध्ये पुरस्कार, अभिनेता कौतुक करत म्हणाला, “तुझ्या नव्या आयुष्याची सुरुवात…”

‘झी चित्र गौरव’ (Zee Chitra Gaurav 2025) पुरस्कारांमध्ये वर्षभरात मराठी मनोरंजन विश्वात उत्कृष्ट कामगिरी करणाऱ्या कलाकारांचा सन्मान करण्यात आला. त्याशिवाय मराठी मनोरंजन विश्वातील अनेक चित्रपटांचा व चित्रपटांतील तंत्रज्ञ मंडळींचाही सन्मान करण्यात आला. विजयी कामगिरी करणाऱ्या या मंडळींवर सध्या कौतुकाचा वर्षाव होत आहे. अशातच अभिनेता कुशल बद्रिकेनं (Kushal Badrike) आपल्या एका मित्रासाठी एक खास पोस्ट शेअर केली आहे. ‘झी चित्र गौरव’ (Zee Chitra Gaurav 2025) पुरस्कार सोहळ्यात ‘घरत गणपती’ या चित्रपटासाठी सुमित पाटीलला (Sumit Patil) सर्वोत्कृष्ट कला दिग्दर्शनाचा पुरस्कार मिळाला.

त्यानिमित्तानं कुशलनं (Kushal Badrike) सुमितबरोबरचा खास फोटो शेअर करीत म्हटलं आहे, “यार तू मिळवलेला पुरस्कार इतक्या आवडीनं मला दाखवायला आणलास. मला कसलं भारी वाटलं. कोकणातले गणपती उत्सव हा अतिशय जवळचा विषय. त्यावेळी होणाऱ्या घरातल्या वातावरणातील ‘घरत गणपती’ (Gharat Ganpati) हा सिनेमा! या सिनेमाचा कलादिग्दर्शक माझा मित्र सुमित पाटीलला यंदाचा ‘झी गौरव पुरस्कार’ (Zee Chitra Gaurav 2025) मिळाला. आनंद आहेच; पण त्याच्या एवढ्या वर्षांच्या कष्टाचं आज बाप्पानं हे फळ दिलं”.

पुढे कुशलनं (Kushal Badrike) असं म्हटलं, “गणपती तयार करण्यापासून ते कोकणातील चित्रकथी, गंजिफा कला आणि पारंपरिक सजावट कायम मनात चित्र करून राहिली. हातांनी केलेले कळीचे मोदक तर मी स्वतः पाहिले आहेत आणि खाल्लेही आहेत. तुझ्या हातात एक जादू आहे. आज तुझा हा पुरस्कार तुझ्या नव्या आयुष्याची सुरुवात आहे. तुझ्यातला कलाकार बाप्पा कायम असाच जपो”. कुशलच्या या पोस्टवर अनेकांनी कमेंट्स करीत सुमितला शुभेच्छा दिल्या आहेत. त्याशिवाय कुशलचंही त्यांनी कौतुक केलं आहे.