अभिनेत्री श्रेया बुगडे व कुशल बद्रिके (Kushal Badrike) हे लोकप्रिय कलाकारांपैकी एक आहेत. त्यांची मैत्रीदेखील चाहत्यांना आवडत असल्याचे वेळोवेळी पाहायला मिळते. ‘चला हवा येऊ द्या’ या गाजलेल्या कार्यक्रमातून या कलाकारांनी वेगवेगळ्या भूमिका साकारत अनोख्या पद्धतीने प्रेक्षकांचे भरपूर मनोरंजन केले. या कार्यक्रमाने निरोप घेतला असला तरी यातील कलाकार विविध माध्यमांतून प्रेक्षकांचे मनोरंजन करत असतात. आता अभिनेता कुशल बद्रिकेने सोशल मीडियावर अभिनेत्री श्रेया बुगडेबरोबरचा एक व्हिडीओ शेअर केला आहे. या व्हिडीओला दिलेली कॅप्शन सध्या चाहत्यांचे लक्ष वेधून घेत आहे.
श्रेया बुगडेबरोबरचा व्हिडीओ शेअर करीत कुशल बद्रिके म्हणाला…
अभिनेता कुशल बद्रिकेने त्याच्या इन्स्टाग्राम अकाउंटवर एक व्हिडीओ शेअर केला आहे. या व्हिडीओमध्ये श्रेया व कुशल आपापल्या व्हॅनिटी व्हॅनमध्ये तयार होत असलेले दिसत आहेत. दोघेही कलाकार सुंदर पोशाखात तयार झालेले व्हिडीओमध्ये पाहायला मिळत आहे. काही दिवसांपूर्वी झी मराठी वाहिनीने संक्रांतीनिमित्त एका खास कार्यक्रमाचे आयोजन केले होते, ज्यामध्ये झी मराठी वाहिनीवरील सर्व मालिकेतील कलाकार सहभागी झाले होते. या कार्यक्रमाचे सूत्रसंचालन कुशल बद्रिके व श्रेया बुगडे यांनी केले होते. त्यांच्या विनोदी स्टाइलने प्रेक्षकांचे मनोरंजन केले. यावेळी कलाकारांनी वेगवेगळे खेळ खेळल्याचे पाहायला मिळाले होते. कुशल बद्रिकेने शेअर केलेला हा व्हिडीओ हा या कार्यक्रमादरम्यानचा असलेला पाहायला मिळत आहे. हा व्हिडीओ शेअर करताना अभिनेत्याने लिहिले, “आनंदाची बातमी आताच दिली असती, पण एवढ्यात नको. आतापुरतं एवढच सांगेन, यह तो बस शुरवात है, आगे पूरी बारात है”, अशी कॅप्शन देत कुशलने प्रेक्षकांचे लक्ष वेधून घेतले आहे.
दरम्यान, संक्रांतीनिमित्ताने आयोजित केलेल्या या कार्यक्रमात मनोरंजनाचे कोर्ट पाहायला मिळाले. या कोर्टात कुशल बद्रिके सगळ्या सासवांच्या बाजूने तर श्रेया बुगडे सगळ्या सुनांच्या बाजूने वकिलाच्या भूमिकेत दिसले होते. या कार्यक्रमातून त्यांनी धमाल केल्याचे पाहायला मिळाले होते.
