‘लक्ष्मीच्या पाऊलांनी’ फेम अभिनेत्याने खरेदी केली आलिशान गाडी! किंमत माहितीये का? व्हिडीओवर होतोय कौतुकाचा वर्षाव

‘लक्ष्मीच्या पाऊलांनी’ या मालिकेत अक्षर कोठारी अद्वैत चांदेकर ही प्रमुख भूमिका साकारत आहे. यापूर्वी सुद्धा अनेक गाजलेल्या मालिकांमध्ये अक्षरने महत्त्वपूर्ण भूमिका साकारल्या आहेत. सध्या अभिनेता त्याच्या नव्या गाडीमुळे चर्चेत आला आहे. अक्षरने जीप कंपास ही आलिशान गाडी खरेदी केली आहे. याचा व्हिडीओ त्याने इन्स्टाग्रामवर शेअर केला आहे.

अक्षरने नव्या गाडीची पूजा करून, पहिली झलक आपल्या चाहत्यांबरोबर शेअर केली आहे. अक्षरने व्हिडीओच्या कॅप्शनमध्ये त्याच्या गाडीचं नाव ‘जीप कंपास मॉडेल एस’ असं नमूद केलं आहे. ‘फायनान्सशिअल एक्स्प्रेस’ने दिलेल्या वृत्तानुसार, या गाडीची किंमत २८.३३ लाख ( एक्स शोरुम ) ते ३२.४५ लाख इतकी आहे.

अक्षरच्या नव्या गाडीच्या व्हिडीओवर तेजश्री प्रधानने कमेंट करत, “वेलकम टू द फॅमिली, जीप कंपास…गूड चॉइस” असं म्हटलं आहे. तर, अभिषेक रहाळकर, अपूर्वा नेमळेकर, आशुतोष गोखले, मुग्धा कर्णिक, सुमीत पुसावळे, चेतन वडनेरे, शिल्पा नवलकर, किशोरी अंबिये, मंदार जाधव या सगळ्या कलाकारांनी कमेंट्स करत अक्षरचं या नव्या गाडीसाठी कौतुक केलं आहे.

दरम्यान, अक्षर कोठारीच्या कामाबद्दल सांगायचं झालं, तर गेली अनेक वर्षे तो कलाविश्वात सक्रिय आहे. ‘कमला’, ‘छोटी मालकीण’, ‘चाहूल’ अशा मालिकांमध्ये त्याने प्रमुख भूमिका साकारल्या होत्या. सध्या अक्षर ‘लक्ष्मीच्या पाऊलांनी’मध्ये मध्यवर्ती भूमिका साकारत आहे.