Maharashtrachi Hasya Jatra : ‘महाराष्ट्राची हास्यजत्रा’ या विनोदी कार्यक्रमाचे फक्त महाराष्ट्रातच नव्हे तर जगभरात चाहते आहेत. या कार्यक्रमाचा चाहतावर्ग मोठ्या प्रमाणात आहे. हास्यजत्रेमुळे अनेक नवोदित कलाकारांना आपली नवीन ओळख निर्माण करण्याची संधी मिळाली. या कार्यक्रमातील प्रत्येक विनोदवीराने प्रेक्षकांच्या मनात एक वेगळं स्थान निर्माण केलं आहे. सध्या या सगळ्या कलाकारांचा मजेशीर व्हिडीओ सोशल मीडियावर चर्चेत आला आहे.
‘महाराष्ट्राची हास्यजत्रा’ ( Maharashtrachi Hasya Jatra ) हा शो आजच्या घडीला घराघरांत लोकप्रिय आहे. या कार्यक्रमातील सगळे कलाकार नुकतेच एकत्र जमले होते. आपल्या शूटिंगमधून वेळात वेळ काढून ही सगळी मंडळी बाहेर फिरायला जात असतात. हे सगळे कलाकार एकत्र आल्यावर धमाल व्हिडीओ बनवत असतात. सध्या सोशल मीडियावर ‘सैयां’ हे गाणं प्रचंड चर्चेत आहे. ‘सैयां’ गाण्याचा सुरुवातीचा आलाप अत्यंत कठीण आहे. त्यामुळे सध्या असंख्य नेटकरी यावर व्हिडीओ बनवत आहेत. हास्यजत्रेच्या कलाकारांनी सुद्धा या ट्रेंडिग गाण्यावर मजेशीर व्हिडीओ बनवला आहे.
हेही वाचा : योगिता चव्हाणला अश्रू अनावर; रितेशसमोर व्यक्त केली ‘बिग बॉस’ सोडण्याची इच्छा, पण…; नेमकं काय घडलं?
‘महाराष्ट्राची हास्यजत्रा’च्या कलाकारांनी शेअर केला मजेशीर व्हिडीओ
पृथ्वीक प्रताप, शिवाली परब, निखिल बने, रोहित माने, वनिता खरात, नम्रता संभेराव, रसिका वेंगुर्लेकर, चेतना भट्ट, इशा डे, प्रसाद खांडेकर, ओंकार राऊत, प्रियदर्शिनी इंदलकर या सगळ्या कलाकारांनी मिळून ‘सैयां’ हे कठीण गाणं गाण्याचा प्रयत्न केला आहे. प्रत्येकजण सुरुवातीला एक-एक करून गाणं गाऊ गातो. परंतु, यांच्यापैकी मोजक्या काही जणांनाच गाणं गाता येतं. त्यामुळे या व्हिडीओमध्ये कोणाला आलाप घेता आला नाही, कोणाचे स्वरच जुळले नाही, काहीजण एक शब्द गायल्यावर हसु लागले अशा बऱ्याच मजेशीर घटना घडल्या आहेत.
‘महाराष्ट्राची हास्यजत्रा’च्या ( Maharashtrachi Hasya Jatra ) कलाकारांनी शेअर केलेल्या व्हिडीओला पृथ्वीक प्रतापने “तुम्ही तुमच्या रिस्कवर बघा”, तर निखिल बनेने “न हसता व्हिडीओ बघा” असं कॅप्शन दिलं आहे. परंतु, या कलाकारांपैकी बहुतेकांचे आवाज सुमधूर नाहीत त्यामुळे सर्वजण मिळून एकमेकांवर खळखळून हसत आहेत. म्हणूनच “व्हिडीओ न हसता बघा” असं या कलाकारांकडून सांगण्यात आलं आहे.
नेटकऱ्यांनी हा व्हिडीओ पाहून अन् कॅप्शन वाचून भन्नाट प्रतिक्रिया दिल्या आहेत. “हसल्याशिवाय राहणार नाही”, “हास्यजत्रा म्हणजे टॉपचा विषय”, “तुम्ही सगळे एकत्र असल्यावर हसायला येणारच ना”, “न हसता तुमचा व्हिडीओ बघणं म्हणजे अशक्य आहे” दरम्यान, काही तासांतच या व्हिडीओवर नेटकऱ्यांनी लाइक्स अन् कमेंट्सचा पाऊस पाडला आहे.
