‘महाराष्ट्राची हास्यजत्रा’ हा कार्यक्रम आज घराघरांत लोकप्रिय आहे. फक्त महाराष्ट्रातच नव्हे तर जगभरात या कार्यक्रमाचे चाहते आहेत. हा मराठी कॉमेडी शो सर्वत्र लोकप्रिय आहे. हास्यजत्रेमुळे अनेक नवोदित कलाकार प्रसिद्धीझोतात आले. घराघरांत या कलाकारांचा चाहतावर्ग निर्माण झाला. वनिता खरात, ओंकार राऊत, मंदार मांडवकर, पृथ्वीक प्रताप, प्रियदर्शिनी इंदलकर, शिवाली परब, रोहित माने, रसिका वेंगुर्लेकर, निखिल हे कलाकार सर्वत्र लोकप्रिय झाले.
‘महाराष्ट्राची हास्यजत्रा’ कार्यक्रमातील सगळेच कलाकार आपल्या मेहनतीच्या जोरावर आजवर इथवर आले आहेत. सुरुवातीच्या काळात प्रचंड मेहनत करून त्यांनी यशाचा एवढा मोठा टप्पा गाठला आहे. ही सगळीच मंडळी आपल्या शेड्यूलमध्ये व्यग्र असतात. परंतु, नुकतेच हे कलाकार वेळात वेळ काढून अलिबाग फिरायला गेले होते. या अलिबाग ट्रिपचा खास व्हिडीओ अभिनेत्री वनिता खरातच्या नवऱ्याने त्यांच्या ‘सुमीतवनी’ या युट्यूब चॅनेलवर शेअर केला आहे.
वनिता खरातचा पती सुमीत लोंढेने शेअर केलेल्या व्हिडीओमध्ये रसिका वेंगुर्लेकर व तिचा पती, ओंकार राऊत, प्रियदर्शिनी इंदलकर, मंदार मांडवकर, रोहित माने व त्याती पत्नी आणि स्वत: वनिता खरात यांची झलक पाहायला मिळत आहे. या सगळ्यांनी अलिबागमध्ये एकत्र भरपूर धमाल केली. स्विमिंग पूलमध्ये मजा करून त्यानंतर या कलाकारांनी एकत्र बसून मांसाहारी जेवणावर ताव मारल्याचं या व्हिडीओमध्ये दिसत आहे.
गेल्यावर्षी हे सगळे कलाकार मिळून प्रियदर्शिनीच्या फार्महाऊसवर गेले होते. यंदा या कलाकारांनी अलिबागमध्ये धमाल केली आहे. आपले लाडके कलाकार दैनंदिन आयुष्यात काय करतात याची उत्सुकता सगळ्याच प्रेक्षकांना असते. त्यामुळे या कलाकारांच्या अलिबाग ट्रिप व्हिडीओवर नेटकऱ्यांनी लाइक्स आणि कमेंट्सचा वर्षाव केला आहे.
दरम्यान, ‘महाराष्ट्राची हास्यजत्रा’ या कार्यक्रमाबद्दल सांगायचं झालं तर, या कार्यक्रमाचे जगभरात विविध ठिकाणी शोज होत असतात. सिंगापूर, ऑस्ट्रेलिया, दुबई, अमेरिका अशा विविध ठिकाणी गेल्या वर्षभरात हास्यजत्रेच्या टीमने दौरे केले होते. या सगळ्या प्रयोगांना प्रेक्षकांचा भरभरून प्रतिसाद मिळाला होता. प्रसाद ओक आणि सई ताम्हणकर या कार्यक्रमात परीक्षकाची जबाबदारी सांभाळत आहेत. तर, अभिनेत्री प्राजक्ता माळी सूत्रसंचालकाची भूमिका निभावत आहे.
