Maharashtrachi Hasya Jatra Fame Actor Wedding Photo : मराठी कलाविश्वात सध्या लगीनघाई सुरू असल्याचं पाहायला मिळत आहे. गेल्या काही दिवसांत अनेक मराठी कलाकार आयुष्याची नवीन सुरुवात करत लग्नबंधनात अडकले. यामध्ये आता आणखी एका अभिनेत्याचं नाव जोडलं गेलं आहे. मराठी मालिका तसेच नाटकांमधून घराघरांत लोकप्रिय झालेला अभिनेता सनीभूषण मुणगेकर विवाहबंधनात अडकला आहे. लग्नसोहळ्यातील फोटो त्याने सोशल मीडियावर शेअर करत ही आनंदाची बातमी आपल्या चाहत्यांना दिली आहे.
सनीभूषण मुणगेकरने लग्नातील फोटो शेअर करत त्यावर “स्वप्नवत सत्यात… श्री व सौ मुणगेकर” असं कॅप्शन दिलं आहे. अभिनेत्याने दिपश्री कवळेशी लग्नगाठ बांधली आहे. सनीभूषण आणि दिपश्री या दोघांनी लग्नसोहळ्यात पारंपरिक लूक केल्याचं पाहायला मिळालं. दिपश्रीन सुद्धा कलाविश्वात सक्रिय आहे. अभिनेत्रीने लग्नसोहळ्यात पिवळ्या रंगाची नऊवारी साडी, हातात हिरवा चुडा, डोक्याला मुंडावळ्या, पिवळ्या नऊवारी साडीवर गुलाबी शेला असा लूक केला होता. तर, सनीभूषणने ऑफ व्हाइट रंगाची शेरवानी घातली होती.
अभिनेता सनीभूषण मुणगेकरच्या कामाबद्दल सांगायचं झालं, सध्या तो जागतिक रंगभूमीवर वर्ल्ड रेकॉर्ड करणाऱ्या मराठी बालनाट्यात काम करत आहे. या नाटकाचं नाव आहे अलबत्या गलबत्या. या बालनाट्याला लहान मुलांसह वरीष्ठ मंडळींचा भरभरून प्रतिसाद मिळत आहे. यामध्ये सनीभूषण मुणगेकरने महत्त्वपूर्ण भूमिका साकारली आहे. याशिवाय अभिनेता ‘महाराष्ट्राची हास्यजत्रा’ या कार्यक्रमात सुद्धा झळकला होता. या शोद्वारे त्याने प्रेक्षकांना खळखळून हसवलं. तसेच सनीभूषणने ‘सन मराठी’ वाहिनीच्या ‘मुलगी पसंत आहे’ या मालिकेत सुद्धा काम केलेलं आहे.
दरम्यान, सनीभूषणची पत्नी दिपश्रीबद्दल सांगायचं झालं, तर ती सुद्धा मराठी कलाविश्वात सक्रिय असते. दिपश्रीने आजवर अनेक नाटकांमध्ये काम केलेलं आहे. याशिवाय ‘बाळुमामाच्या नावाने चांगभलं’, ‘गाथा नवनाथांची’, ‘जागो मोहन प्यारे’ या मालिकांमध्येही ती झळकली आहे.
© IE Online Media Services (P) Ltd