Maharashtrachi Hasyajatra : गेल्या कित्येक वर्षांपासून प्रेक्षकांचं मनोरंजन करणारा कार्यक्रम म्हणजे ‘महाराष्ट्राची हास्यजत्रा’. ‘सोनी मराठी’ वाहिनीवरील या कार्यक्रमाला आजही तितकाच प्रेक्षकांचा उदंड प्रतिसाद मिळत आहे. ‘महाराष्ट्राची हास्यजत्रा’ कार्यक्रमातील कलाकार घराघरात पोहोचले आहेत. कलाकारांच्या विनोद शैलीने प्रेक्षकांच्या मनात एक वेगळं स्थान निर्माण केलं आहे. महत्त्वाचं म्हणजे ‘महाराष्ट्राची हास्यजत्रा’ कार्यक्रमाने सिनेसृष्टीला बरेच नवोदित कलाकार दिले; जे आता मराठीसह हिंदी सिनेसृष्टीतही उत्कृष्ट काम करताना दिसत आहेत. अशातच या कलाकारांच्या तालीमचा व्हिडीओ सध्या चांगलाच चर्चेत आला आहे.
अभिनेता, दिग्दर्शक, लेखक प्रसाद खांडेकरने तालीमचा व्हिडीओ शेअर केला आहे. “भजनाच स्कीट असेल तर तालीमला एक वेगळाच उत्साह असतो,” असं कॅप्शन लिहित प्रसादने हा व्हिडीओ शेअर केला आहे. या व्हिडीओत, प्रसाद खांडेकरसह अभिनेत्री शिवाली परब, श्रमेश बेटकर, प्रथमेश शिवलकर, वनिता खरात, निखिल बने, प्रभाकर मोरे, अरुण कदम, समीर चौघुले असे सगळे कलाकार मंडळी पाहायला मिळत आहे. यामध्ये भजनाच्या स्कीटची तयारी करताना सर्व कलाकार दिसत आहेत. ‘सुखकर्ता दुःखहर्ता’, ‘गणा धाव रे’ ही लोकप्रिय गाणी सर्व कलाकार उत्साहात गाताना पाहायला मिळत आहेत.
हेही वाचा – Video: आठवड्याची सुरुवात भांडणाने! निक्कीने इतरांचे कपडे फेकत घातला वाद, अंकिता वालावलकरला दिला धक्का अन्…
हेही वाचा – Video: जान्हवी किल्लेकरची अंकिताने सांगितलेली ‘ती’ कृती ऐकून रितेश देशमुखला बसला आश्चर्याचा धक्का, म्हणाला…
प्रसाद खांडेकरने शेअर केलेला हा व्हिडीओ सध्या सोशल मीडियावर चांगलाच व्हायरल झाला आहे. या व्हिडीओवर चाहत्यांनी भरभरून प्रतिक्रिया दिल्या आहेत. “अरे वा”, “खूप छान”, “सगळे जण गणपती भजन घेऊन या”, “तुम्ही जे करता ते लोकांना खूप साधं वाटतं पण तुमचं पाठांतर मेहनत खूप असते दादा”, अशा प्रतिक्रियांच्या माध्यमातून चाहत्यांनी प्रेम व्यक्त केलं आहे.
हास्यजत्रेचा लवकरच कॅनडा दौरा
दरम्यान, ‘महाराष्ट्राची हास्यजत्रा’ कार्यक्रमाचा आता कॅनडा दौरा होणार आहे. ऑक्टोबरला हास्यजत्रेतील कलाकार कॅनडातील प्रेक्षकांच्या खळखळून हसवण्यासाठी जाणार आहेत. १० ऑक्टोबर ते १४ ऑक्टोबरपर्यंतचा हा दौरा असणार आहे. याआधी ‘महाराष्ट्राची हास्यजत्रा’ या लोकप्रिय कार्यक्रमाचा दौरा ऑस्ट्रेलिया, अमेरिकेला झाला होता.
