‘महाराष्ट्राची हास्यजत्रा’ कार्यक्रमातून प्रेक्षकांना हसवणारे दादूस म्हणजेच अरुण कदम आजोबा झाले आहेत. त्यांच्या लेकीने काही महिन्यांपूर्वी गूड न्यूज दिली होती. आता तिने बाळाला जन्म दिला आहे. अरुण कदम यांनीच आजोबा झाल्याची आनंदाची बातमी दिली आहे.
‘महाराष्ट्राची हास्यजत्रा’मध्ये विविध प्रकारची पात्रं अरुण कदम साकारतात. ते आपल्या विनोदांनी प्रेक्षकांना खूप हसवतात. या शोमुळे राज्यभरात घरोघरी लोकप्रिय झालेले अरुण कदम आता आजोबा झाले आहेत. त्यांची मुलगी सुकन्याने आज (१९ ऑगस्ट रोजी) मुलाला जन्म दिला आहे.
जून महिन्यात अरुण कदम यांनी लेकीच्या डोहाळेजेवणाचे फोटो सोशल मीडियावर शेअर केले होते. तिने खास मॅटर्निटी फोटो शूट केलं होतं, त्या फोटोंची खूप चर्चा झाली होती. दरम्यान, २०२१मध्ये सुकन्याचं लग्न सागर पोवाळेशी झालं. ती कमर्शिअल आर्टिस्ट व ग्राफिक डिझायनर आहे. शिवाय ती भरतनाट्यमही शिकली आहे. वडिलांबरोबर अनेक रील व्हिडीओ ती बनवते.
