‘महाराष्ट्राची हास्यजत्रा’ हा छोट्या पडद्यावरील लोकप्रिय कार्यक्रम आहे. संपूर्ण महाराष्ट्रभर या कार्यक्रमाचे लाखो चाहते आहेत. या कार्यक्रमातील विनोदवीरांनी प्रेक्षकांच्या मनात घर केलं आहे. अभिनेता प्रसाद खांडेकर आणि गौरव मोरे यांनाही याच कार्यक्रमातून लोकप्रियता मिळाली.
‘महाराष्ट्राची हास्यजत्रा’ टीमने नुकतंच ‘एबीपी वाहिनी’च्या ‘माझा कट्टा’मध्ये हजेरी लावली. प्रसाद आणि गौरव मोरेसह हास्यजत्रेतील रसिका वेंगुर्लेकर, नम्रता संभेराव, पृथ्वीक प्रताप हे विनोदवीरही उपस्थित होते. लेखक, दिग्दर्शक सचिन मोटे आणि सचिन गोस्वामी यांनीही हजेरी लावली. या मुलाखतीत हास्यजत्रेच्या पडद्यामागचे अनेक किस्से विनोदवीरांनी शेअर केले. यावेळी हास्यजत्रेतील विनोदवीर कसे सापडले, याबद्दलही मोटे आणि गोस्वामी यांनी सांगितले.
हेही वाचा >> दिवाळीत होळी साजरी करतेय विराट कोहलीची लेक, वामिकाचा फोटो शेअर करत अनुष्का म्हणाली…
प्रसाद खांडेकर लेखक आणि दिग्दर्शक म्हणून पहिल्यापासूनच काम करत होता. परंतु, गौरव मोरेने हास्यजत्रेसाठी अनेक ऑडिशन दिल्या होत्या. हास्यजत्रेच्या पहिल्या ऑडिशनसाठी गौरव आणि प्रसाद एकत्र गेले होते. यावेळी प्रसाद त्याला “तुझं सिलेक्शन झालं पाहिजे. माझा कल जास्त दिग्दर्शन आणि लेखन याकडे आहे”, असं म्हणाला होता. “गौरवला सचिन मोटे सर ओळखत होते. त्यामुळे तुझं सिलेक्शन होणार, असं मी त्याला म्हणालो होतो”, असंही प्रसादने सांगितलं. परंतु, ऑडिशन दिल्यानंतर प्रसादची निवड झाली. त्यानंतर गौरवने हास्यजत्रेसाठी अनेक ऑडिशन दिले. त्यातील एका ऑडिशनमध्ये त्याचं सिलेक्शन झालं.
गौरव त्याच्या विनोदबुद्धीने प्रेक्षकांना खळखळून हसायला भाग पाडतो. नुकताच तो लंडनमध्ये चित्रपटाच्या शूटिंगसाठी गेला होता. याआधी तो ‘हवाहवाई’ चित्रपटात झळकला होता. प्रसाद खांडेकरही ‘एकदा येऊन तर बघा’ हा चित्रपट घेऊन प्रेक्षकांच्या भेटीला येत आहे. या चित्रपटात ‘महाराष्ट्राची हास्यजत्रा’ कार्यक्रमातील कलाकारांची फौज दिसणार आहे.
