पुढच्या आठवड्यात सुरु होणाऱ्या गणेशोत्सवानिमित्त सध्या सगळीकडे आनंदाचं आणि उत्साहाचं वातावरण आहे. कुणी घरीच गणपतीची मूर्ती बनवत आहे, तर कोणी सजावटीच्या तयारीला लागलं आहे. पण गणपती म्हटलं की पटकन डोळ्यासमोर येतात ते मोदक. अनेक जण मोदक घरीच बनवण्याच्या प्रयत्नात असतात. काहींना ते जमतात, तर काहींचा आकार बिघडतो. तर आता मोदक बनवण्यासाठी अभिनेत्री विशाखा सुभेदार यांनी एक खास टीप दिली आहे.
विशाखा सुभेदार आत्तापर्यंत अनेक कार्यक्रम आणि मालिकांमधून प्रेक्षकांच्या भेटीला आल्या आहेत. त्यांच्या घरीही गणपती असतो. शूटिंगच्या व्यग्र वेळापत्रकातून वेळ काढून त्या घरी नातेवाईक आणि मित्रमंडळींबरोबर गणेशोत्सव साजरा करतात. दरवर्षी त्या नैवेद्य आणि मोदक घरीच बनवतात. तर आता त्यांनी मोदक कसे चांगले होतात आणि त्यासाठी काय महत्त्वाचं असतं हे सांगितलं आहे.
नुकत्याच दिलेल्या एका मुलाखतीत त्या म्हणाल्या, “आमच्या घरी गणपतीला जवळपास १०० मोदक असतात आणि सगळेजण त्यावर ताव मारतात. आम्ही घरीच मोदक करतो. मोदकाच्या ज्या पाकळ्या असतात त्या करण्याच्या भानगडीत पडू नका. त्या चांगल्या आल्या किंवा नाही आल्या याचा काही फरक पडत नाही. शेवटी मोदक उकडल्यावर कसा दिसतो यापेक्षाही तो कसा लागतो याला जास्त महत्त्व आहे. त्यामुळे सारण उत्तम जमलं आणि पाकळ्या थोड्याशा इकडे तिकडे झाल्या तरीही आपल्या सगळ्यांची भावना इतकी भक्तीमय असते की तो मोदक गोडच लागतो.”
तर आता त्यांचं हे बोलणं सर्वांचं लक्ष वेधून घेत आहे. तर यावर कमेंट करत नेटकरी त्यांचा हा फंडा आवडल्याचं सांगत आहेत.
