‘महाराष्ट्राची हास्यजत्रा’ या कार्यक्रमामुळे गौरव मोरे प्रकाशझोतात आला. तो या कार्यक्रमापुरतीच मर्यादीत राहिला नाही. आता मराठी चित्रपटांमध्येही गौरव काम करताना दिसत आहे. ‘हवाहवाई’ या मराठी चित्रपटामध्येही त्याने महत्त्वाची भूमिका साकारली होती. इतकंच नव्हे तर काही महिन्यांपूर्वी त्याने भरत जाधव यांच्यासह एका नव्या मराठी चित्रपटाचं चित्रीकरण पूर्ण केलं. दरम्यान गौरवच्या अभिनयासह त्याच्या हेअर स्टाइलची सर्वाधिक चर्चा रंगताना दिसते.
‘महाराष्ट्राची हास्यजत्रा’मध्ये गौरवर साकारत असलेलं प्रत्येक पात्र प्रेक्षकांना प्रचंड आवडतं. आपल्या विनोदी शैलीने प्रेक्षकांना खळखळून हसवण्यात तो कायमच यशस्वी ठरतो. त्याची हेअरस्टाइल तर विशेष लक्षवेधी असते. लांब केस तो जेव्हा मान डोलवत हवेत उडवतो ते प्रेक्षकांना विशेष आवडतं. त्याची हेअरस्टाइलच त्याच्या प्रत्येक पात्राची खासियत असते.
“आय एम गौरवर मोरे फ्रॉम पवई फिल्टर पाडा” हे वाक्य गौरवच्या तोंडून ऐकायचा अधिक गंमतीशीर वाटतं. त्याच्या स्किटची सुरुवातच या वाक्याने होते. हे वाक्य बोलून झाल्यानंतर तो आपले केस हवेत उडवताना दिसतो. आता त्याने त्याची हेअरस्टाइल बदलली आहे. त्याने यादरम्यानचा फोटोही सोशल मीडिया अकाऊंटद्वारे शेअर केला होता.
नव्या हेअरस्टाइलचा फोटो शेअर करत गौरव म्हणाला, “माझी नवी हेअरस्टाइल”. या फोटोमध्ये गौरवने बाजूचे वाढलेले केस थोडे कापलेले दिसत आहेत. तर केसांचा मधला भाग उंच केलेला दिसत आहे. गौरवचा हा लूक अगदी हटके वाटत आहे. पण ‘महाराष्ट्राची हास्यजत्रा’मधील पुढील भागांमध्येही त्याची हेअरस्टाइल बदलणार का? हे पाहणं रंजक ठरेल.
