छोट्या पडद्यावरील लोकप्रिय कार्यक्रम ‘महाराष्ट्राची हास्यजत्रा’ गेल्या कित्येक वर्षांपासून प्रेक्षकांचं मनोरंजन करत आहे. या कार्यक्रमातील प्रत्येक कलाकाराने प्रेक्षकांच्या मनात एक वेगळं स्थान निर्माण केलं आहे. तसेच प्रत्येक कलाकाराचा एक वेगळा चाहतावर्ग तयार झाला आहे. यापैकी एक म्हणजे गौरव मोरे. गौरवने विनोदाच्या अचूक टायमिंगने प्रेक्षकांची मनं जिंकली आहेत. सध्या त्याचे नवनवीन एकामागून एक चित्रपट प्रदर्शित होतं आहे. त्यामुळे आजकाल तो नेहमी चर्चेत असतो. असा हा लोकप्रिय गौरव नुकताच अभिनेत्री भार्गवी चिरमुलेच्या ‘गप्पा मस्ती पॉडकास्ट’मध्ये सहभागी झाला होता. यावेळी त्याने एक असा प्रसंग सांगितला; जो पाहून त्याला भरून आलं होतं. भार्गवी चिरमुलेच्या ‘गप्पा मस्ती पॉडकास्ट’मध्ये गौरव मोरेबरोबर रॅपिड फायर हा खेळ खेळण्यात आला. यावेळी गौरवला त्याच्या क्रशपासून ते आवडती गाडी असे अनेक प्रश्न विचारले गेले. यादरम्यान भार्गवीने त्याला विचारलं की, तुला आलेली सर्वात चांगली प्रतिक्रिया कोणती होती? यावर गौरव म्हणाला की, लहान मुलांनी माझं जास्त कौतुक केलंय. फोन करून ते बोलतात. हेही वाचा - “L दाबला अन्…”, ‘महाराष्ट्राची हास्यजत्रा’ फेम गौरव मोरेने सई ताम्हणकरला चुकून केला होता ‘हा’ मेसेज पुढे एक किस्सा सांगत म्हणाला, "पण एक मला खूप छान आठवण आठवतेय. मी फिल्टरपाड्याच्या नाक्यावरती उभा होतो. तेव्हा एक मर्सिडीज आली, थांबली, काच खाली केली आणि आतमध्ये बसलेल्या माणसाने माझ्याकडे बघून अंगठा दाखवून बेस्ट असं केलं. एवढंच त्यांनी केलं. ही माझ्यासाठी सर्वात चांगली प्रतिक्रिया होती. तेव्हा मी नाक्यावर छोटी चड्डी घालून उभा होतो. मी त्यांना बघून हात जोडले आणि आभार मानले. मला खूप भरून आलं. म्हटलं एवढी मोठी गाडी थांबली आणि जे कोणी साहेब असतील त्यांनी हातवारे करून आपलं कौतुक केलं. याचा अर्थ आपलं काम त्यांच्यापर्यंत पोहोचलं. माझ्यासाठी ही गोष्ट खूप चांगली आहे."
