‘महाराष्ट्राची हास्यजत्रा’ या कॉमेडी शोमधून प्रेक्षकांचं मनोरंजन करणारा विनोदवीर पृथ्वीक प्रताप अलीकडे त्याच्या रिल्समुळे चर्चेत असतो. पृथ्वीकने अनेक मालिका आणि चित्रपटांमध्ये काम करून आपल्या अभिनयाचा ठसा उमटवला आहे. त्याचा चाहतावर्ग खूप मोठा आहे. चाहत्यांच्या संपर्कात राहण्यासाठी पृथ्वीक सोशल मीडियावर कायम सक्रिय असतो. अभिनय क्षेत्रासह वैयक्तिक आयुष्यातल्या गोष्टीही तो चाहत्यांबरोबर शेअर करत असतो. सध्या पृथ्वीकची इन्स्टाग्रामवरील एक पोस्ट चर्चेत आहे.
पृथ्वीकने एका ठिकाणी पोहोचण्यासाठी एक उबेर कॅब बूक केली होती. ती बूक केल्यानंतर त्याला एक मेसेज आला. त्या मेसेजचा स्क्रिनशॉट त्याने इन्स्टाग्राम स्टोरीवर शेअर केला आहे. त्या स्क्रिनशॉटमध्ये असं लिहिलंय की, “तुमचा ड्रायव्हर येत आहे. इम्तियाज अली लवकरच बजाज रिकॉम्पॅक्टच्या येथे पोहोचतोय. तिथे पोहोचल्यानंतर शुल्क सुरू होण्यापूर्वी तो तीन मिनिटे तिथे प्रतीक्षा करेल.” हा मेसेज पाहताच पृथ्वीकने त्याला कॅप्शन देत लिहिलं, “जिंदगी का इतना भी तमाशा नही बनाना था के इम्तियाज अली खूद पिक अप के लिए आए.” (“आयुष्याचा एवढा तमाशा करून घ्यायचा नव्हता की इम्तियाज अली स्वत: घ्यायला येईल”)
पृथ्वीकने शेअर केलेली ही पोस्ट सध्या सोशल मीडियावर तुफान व्हायरल होतेय. पृथ्वीकने काल सोशल मीडियावर प्रथमेश परब, मनमीत पेम, विशाल जाधव, कॉमेडी इन्फ्लुएंसर मॅन्डी यांच्याबरोबर एक डान्स रीलदेखील शेअर केली होती. ‘इल्लुमिनाटी’ या गाण्यावर त्यांनी हटके स्टेप्स करत डान्स केला आहे. पृथ्वीकच्या या रीलचीदेखील सगळीकडे चर्चा आहे.
हेही वाचा… “अतिशय वेगळा असा आळस…”, ‘पारू’ फेम शरयू सोनावणेने शेअर केला गणीबरोबर ‘खास’ व्हिडीओ; म्हणाली…
दरम्यान, पृथ्वीकच्या कामाबद्दल सांगायचं झालं, तर पृथ्वीक शेवटचा ‘डिलिव्हरी बॉय’ या चित्रपटात झळकला होता. आता अभिनेता दिया मिर्झाच्या आगामी प्रोजेक्टमध्ये झळकणार आहे.
‘पन्हं’ या नावाची नवीन शॉर्ट फिल्म लवकरच प्रेक्षकांच्या भेटीला येणार आहे. या शॉर्ट फिल्मची दिया ही निर्माती असून, त्यामध्ये बरेच मराठी कलाकार दिसणार आहेत. त्यामध्ये पृथ्वीक प्रतापसह अभिनेत्री सायली संजीव, सुहास शिरसाट या कलाकारांचाही समावेश आहे.
© IE Online Media Services (P) Ltd
