‘झी मराठी’ वाहिनीवरील गाजलेल्या मालिकांपैकी एक म्हणजे ‘माझी तुझी रेशीमगाठ’ मालिका. अभिनेता श्रेयस तळपदे व अभिनेत्री प्रार्थना बेहेरे यांची प्रमुख भूमिका असलेल्या या मालिकेने प्रेक्षकांच्या मनावर अधिराज्य गाजवलं. २०२१ला सुरू झालेल्या ‘माझी तुझी रेशीमगाठ’ मालिकेने अडीच वर्ष प्रेक्षकांचं मनोरंजन केलं. या मालिकेतील यश (श्रेयस तळपदे) व नेहा (प्रार्थना बेहेरे) ही जोडी जितकी लोकप्रिय झाली तितकीच लोकप्रिय यश व समीरची (संकर्षण कऱ्हाडे) मैत्रीण झाली. यश व समीरची मैत्री खऱ्या आयुष्यातही तितकीच छान आहे. मालिका संपून वर्ष झालं असलं तरी अजूनही दोघं कायम सोशल मीडियावर एकत्र असलेले फोटो शेअर करत असतात. नुकत्याच दोघांच्या एका फोटोमुळे ‘माझी तुझी रेशीमगाठ २’च्या चर्चांना उधाण आलं आहे.
‘माझी तुझी रेशीमगाठ मालिकेतील’ यश म्हणजे अभिनेता श्रेयस तळपदे व समीर म्हणजे अभिनेता संकर्षण कऱ्हाडेची नुकतीच भेट झाली. या खास भेटीचा फोटो संकर्षणने इन्स्टाग्रामवर शेअर केला आहे. याच फोटोमुळे चाहत्यांना सुखद धक्का बसला असून ‘माझी तुझी रेशीमगाठ’ मालिकेच्या दुसऱ्या भागाच्या चर्चांना उधाण आलं आहे. “खूप दिवसांनंतर ही जोडी बघायला खूप छान वाटलं”, “भाऊ-भाऊ दिसत आहात”, “ही जोडी तुटायची नाही”, “जय-वीरू”, “माझी तुझी रेशीमगाठ २ येतेय का?”, “माझी तुझी रेशीमगाठ २मध्ये तुमची मैत्री परत बघायला आवडेल”, अशा चाहत्यांच्या प्रतिक्रिया श्रेयस व संकर्षणला पाहून उमटल्या आहेत.
हेही वाचा – Video: ‘पारू’ मालिकेतील आदित्यने खऱ्या बायकोसाठी केला खास पदार्थ, व्हिडीओ शेअर करत म्हणाली, “माझा सॉलिड शेफ”
अभिनेता संकर्षण कऱ्हाडेने श्रेयसबरोबरचा फोटो शेअर करत लिहिलं आहे, “श्रेयस संकर्षण = यश समीर…काल खूप दिवसांनी भेटलो..खूप गप्पा मारल्या..खूप हसलो…फार फार मज्जा आली…या गप्पा तुम्हालाही पाहायला, ऐकायला आवडतील का? कुठे कसं ते श्रेयस तळपदे सांगतील.”
संकर्षणच्या या कॅप्शनवरून ‘माझी तुझी रेशीमगाठ २’ मालिकेसाठी ही भेट झाली नसून संकर्षणने श्रेयसची घेतलेली एखादी मुलाखत असण्याची शक्यता वर्तवली जात आहे. त्यामुळे आता या भेटीमागचं नेमकं कारण ‘माझी तुझी रेशीमगाठ २’ आहे की मुलाखत हे श्रेयसच्या खुलासानंतर समोर येईल.
© IE Online Media Services (P) Ltd
