‘माझ्या नवऱ्याची बायको’ या मालिकेत रेवती हे पात्र साकारून लोकप्रिय झालेली अभिनेत्री श्वेता मेहेंदळे सोशल मीडियावर खूप सक्रिय आहे. ती फोटो, व्हिडीओ शेअर करत चाहत्यांना अपडेट्स देत असते. श्वेताचा पती राहुल मेहेंदळेदेखील लोकप्रिय मराठी अभिनेता आहे. श्वेता ‘माझ्या नवऱ्याची बायको’ ही मालिका करत असताना तिच्या राहुलला ब्रेन स्ट्रोक आला होता. तिने एका मुलाखतीत अलीकडेच तिच्या आयुष्यातील या आव्हानात्मक आणि भावनिक काळाबद्दल भाष्य केलं.
अक्षय कुमारने पान मसाल्याच्या जाहिरातीवर दिलं स्पष्टीकरण, म्हणाला, “अशा उत्पादनांचं जाहीरपणे…”
श्वेता म्हणाली, “मी शोचे शूटिंग करत होते आणि अचानक माझ्या वडिलांचा फोन आला की त्यांनी राहुलला हॉस्पिटलमध्ये दाखल केले आहे. मी सेटवर कोणाला काही सांगितले नाही. मी तिथून निघाले आणि हॉस्पिटलमध्ये पोहोचले. तिथे गेल्यावर राहुलला ब्रेन स्ट्रोक झाल्याचे मला कळाले. त्याला बोलताही येत नव्हते. तो परत अभिनय करू शकेल की नाही याची मला काळजी वाटत होती. या कठीण काळात राहुलच्या कुटुंबीयांनी आणि भावांनी आम्हाला मदत केली. तो बरा झाला आणि आता पुन्हा शोमध्ये काम करतोय, हे बघून मी खूप आनंदी आहे.”
दरम्यान, श्वेता व राहुल दोघेही मराठी इंडस्ट्रीत सक्रिय असलेले जोडपे आहे. ‘या गोजिरवाण्या घरात’ या मालिकेत श्वेता आणि राहुलने एकत्र काम केले होते. या मालिकेच्या सेटवरच श्वेता आणि राहुलच्या मैत्रीचे प्रेमात रुपांतर झाले, नंतर त्यांनी लग्नगाठ बांधली. दोघांना एक मुलगा असून त्याचे नाव आर्य आहे.
