अभिनेता अजिंक्य राऊत व अभिनेत्री हृता दुर्गुळे यांची प्रमुख भूमिका असलेली ‘मन उडू उडू झालं’ ही मालिका चांगलीच गाजली. या मालिकेने अल्पावधीतच प्रेक्षकांच्या मनात स्थान निर्माण केलं होतं. या मालिकेतील प्रत्येक पात्र घराघरात पोहोचलं होतं. मग ते नायकाचं असो किंवा खलनायकाचं प्रेक्षकांनी प्रत्येक पात्राला अक्षरशः डोक्यावर उचलून धरलं होतं. आता या मालिकेतील एक अभिनेता ‘धर्मवीर २’ चित्रपटात झळकणार आहे. याबाबत त्याने ‘धर्मवीर २’ चित्रपटातील सेटवरचे फोटो शेअर करून माहिती दिली आहे.
हेही वाचा – सई लोकूरने लेकीची पहिली झलक शेअर करत सांगितलं नाव, म्हणाली, “आमची परी… “
धर्मवीर आनंद दिघे यांच्या जीवनावर आधारित असलेल्या ‘धर्मवीर: मुक्काम पोस्ट ठाणे’ या चित्रपटाला प्रेक्षकांचा तुफान प्रतिसाद मिळाला होता. प्रवीण तरडे दिग्दर्शित हा चित्रपट सर्वाधिक लोकप्रिय ठरला होता. या चित्रपटाने बॉक्स ऑफिसवर नवे विक्रमही केले होते. त्यानंतर आता लवकरच ‘धर्मवीर २’ प्रेक्षकांच्या भेटीस येणार आहे. २०२३च्या अखेरीस या चित्रपटाच्या चित्रीकरणाला सुरुवात झाली आहे. या चित्रपटात ‘मन उडू उडू झालं’ मालिकेतील अभिनेता ऋतुराज फडके पाहायला मिळणार आहे.
ऋतुराज फडकेने नुकतेच सोशल मीडियावर ‘धर्मवीर २’ चित्रपटाच्या सेटवरील फोटो पोस्ट केले आहेत. यामधील पहिल्या फोटोमध्ये ऋतुराज दिग्दर्शक प्रवीण तरडे यांच्याबरोबर पाहायला मिळत आहे. तर दुसऱ्या व तिसऱ्या फोटोमध्ये तो भूमिकेत पाहायला मिळत आहे. पण तो कोणत्या भूमिकेत झळकणार आहे? हे गुलदस्त्यात आहे.
दरम्यान, ऋतुराजच्या कामाबद्दल बोलायचं झालं, तर तो ‘मन उडू उडू झालं’ या मालिकेनंतर इतर बऱ्याच मालिकांमध्ये झळकला होता. सध्या तो ‘२१७ पद्मिनी धाम’ या नाटकात काम करत आहे. या नाटकात ऋतुराजबरोबर अमृता पवार, सचिन नवरे, अनिकेत कदम, सुबोध वाळणकर आणि मिलिंद शिंदे पाहायला मिळत आहे.
