महाराष्ट्रातील लाखो महिलांचा लोकप्रिय कार्यक्रम म्हणून ‘होम मिनिस्टर’ला ओळखले जाते. दार उघड बये दार उघड म्हणत सुरु झालेला ‘होम मिनिस्टर’चा हा कार्यक्रम आता २०व्या वर्षात पदार्पण करत आहे. या निमित्ताने अभिनेते आदेश बांदेकर यांनी त्यांच्या भावना व्यक्त केल्या.
आदेश बांदेकरांनी नुकतंच इन्स्टाग्रामवर लाईव्ह केले. या लाईव्हमध्ये त्यांनी ‘होम मिनिस्टर’ या कार्यक्रमाबद्दल त्यांना काय वाटते? याबद्दल सांगितले. तसेच त्यांनी प्रेक्षकांचे आभारही मानले.
आणखी वाचा : “राज ठाकरेंच्या घरी गेलो तेव्हा…”, कोकण हार्टेड गर्लने सांगितला ‘तो’ किस्सा, म्हणाली “ते मुख्यमंत्री…”
“नमस्कार, होम मिनिस्टर या कार्यक्रमाला १९ वर्ष पूर्ण होतात आणि २० व्या वर्षात आपण पदार्पण करतोय. हा अत्यंत आनंदाचा क्षण आहे. साधारण आजपासून बरोबर १९ वर्षांपूर्वी १३ सप्टेंबरला पहिला भाग प्रदर्शित झाला होता आणि तिथून हा प्रवास सुरु झाला. मागे वळून बघताना जवळपास ६००० एपिसोड झाले. मला याचा अतिशय अभिमान वाटतो. जगाच्या नकाशावर सोमवार ते शनिवार आनंद देणारा कार्यक्रम आपल्या प्रत्येकाने त्याचा स्वीकार केला.
घराघरातल्या आई, बहिणी, माऊलींचा सन्मान करत तसेच आनंदाची उधळण करत, घरातलं टेन्शन काही काळ नाहीसा करणारा हा कार्यक्रम करता आला. यामुळे मला छान वाटलं. असंच तुमचं प्रेम कायम ठेवा. होम मिनिस्टर या कार्यक्रमाने १९ वर्षे पूर्ण केली. लाखो कुटुंबांनी मला आशीर्वाद दिला.
लहान मुलांपासून आजी आजोबांपर्यंत तुम्ही दिलेलं प्रेम आणि आशीर्वाद हे मला कायम समृद्ध करणारा होता. या निमित्ताने मी माझ्या कुटुंबाला सुचित्रा, सोहम आणि माझे वडील यांना मी धन्यवाद म्हणेन. त्यांनी मला कायमच प्रोत्साहन दिलं. घराघरात जाऊन इतका प्रवास करताना त्यांनी मला कधीच नको म्हटलं नाही. त्याच आशीर्वादाच्या जोरावर २० वं वर्षही साजर करुया”, असे आदेश बांदेकर म्हणाले.
आणखी वाचा : “…म्हणून मी बाजूला झाले”, ‘महाराष्ट्राची हास्यजत्रा’मध्ये परतण्याबद्दल विशाखा सुभेदार यांचं स्पष्ट वक्तव्य
दरम्यान ‘होम मिनिस्टर’ हा कार्यक्रम महाराष्ट्राच्या घराघरात लोकप्रिय आहे. हा कार्यक्रम सादर करणारे सूत्रसंचालक आदेश बांदेकर हे ‘भावोजी’ म्हणून घराघरात लोकप्रिय झाले आहेत. या कार्यक्रमाने जवळपास १० लाख किलोमीटरपेक्षा जास्त प्रवास, ६००० भाग आणि १२००० घर इतका मोठा पल्ला गाठला आहे.
