गेली अनेक वर्ष त्याचा विनोदी शैलीने प्रेक्षकांच्या मनावर राज्य असलेला अभिनेता म्हणून कुशल बद्रिकेकडे पाहिले जाते. विनोदाचा बादशाह, हुकमी एक्का म्हणून त्याला ओळखले जाते. ‘चला हवा येऊ द्या’ या कार्यक्रमामधील त्याच्या कामाचे नेहमीच भरभरून कौतुक होते. त्याच्या विनोदाच्या टायमिंगला आणि त्याच्या उत्स्फूर्तेला प्रेक्षक भरभरून प्रतिसाद देतात. नुकतंच कुशलने एक खास पोस्ट शेअर केली आहे.
कुशल बद्रिके हा इन्स्टाग्रामवर सक्रीय असतो. तो कायमच विविध पोस्ट करताना दिसतो. नुकतंच कुशल बद्रिकेने इन्स्टाग्रामवर एक फोटो शेअर केला आहे. याला त्याने बालपणीची गोष्ट सांगितली आहे.
आणखी वाचा : “खरंतर ऐन उन्हाळ्यात चित्रपट प्रदर्शित करायला हवा होता…”, संजय मोने यांची पोस्ट; म्हणाले “नाव ‘बाईपण भारी देवा’ असलं तरी…”
कुशल बद्रिकेची पोस्ट
“म्हातारीच्या कापसाची गोष्ट.
लहानपणी, अलगद ओंजळीत झेललेल्या ”म्हातारीच्या कापसाला” मी हळूच फुंकर घालायचो की तो कापूस हवे सोबत उडत… उडत… जायचा मग पुन्हा अलगद त्याला ओंजळीत झेलायचं,पुन्हा फुंकर, पुन्हा हवा, तोच खेळ पुन्हा पुन्हा. मग कधीतरी जोराचा वारा यायचा आणि कुणास ठाऊक कुठे ? पण “म्हातारीचा कापूस” घेऊन लांब… उडून जायचा आणि मी… मी त्या उडत जाणाऱ्या “म्हातारीच्या कापसाकडे” नुसतं बघत रहायचो, असहायपणे तो दिसेनासा होईपर्यंत.
आणि मनात मात्र खूप दुःख-दुःख व्हायचं.
त्यावेळी त्या “म्हातारीच्या कापसाने” मनाला झालेली जखम आजपर्यंत कोणत्याच कापसाने टिपता आली नाही मला.
हल्ली, काही नाती सुद्धा त्या “म्हातारीच्या कापसासारखी” अलगद ओंजळीतून निसटून जात आहेत आणि मला मात्र पुन्हा लहान झाल्यासारखं झालंय, “उडून जाणाऱ्या म्हातारी कडे नुसतं बघत बसणारं एक लहान मुल”, असे कॅप्शन कुशल बद्रिकेने म्हटले आहे.
कुशलच्या या पोस्टवर अभिनेता संतोष जुवेकरने कमेंट केली आहे. “तू आता फक्त २ बोटं उरलायस शाहरुख व्हायला, होशील लवकरच होशील. फक्त आता केस सतत डोळ्यावर येण्याची acting करत रहा”, असे संतोष जुवेकरने म्हटले आहे.
