Bigg Boss 18 Winner Karan Veer Mehra : गेल्या १०५ दिवसांपासून ‘बिग बॉस’चं १८वं पर्व प्रेक्षकांचं मनोरंजन करत होतं. ६ ऑक्टोबर २०२४ पासून सुरू झालेल्या या पर्वाने १९ जानेवारीला प्रेक्षकांचा निरोप घेतला. ‘बिग बॉस’च्या १८व्या पर्वाचा विजेता करणवीर मेहरा ठरला. प्रेक्षकांच्या भरघोस मतांनुसार करणवीर मेहरा ‘बिग बॉस १८’ विजयी झाल्याची घोषणा सलमान खानने केली. विवियन डिसेना हा पहिला रनर-अप तर रजत दलाल दुसरा रनर-अप ठरला. करणवीर जिंकल्यामुळे सध्या इतर कलाकार मंडळींसह चाहते त्याला शुभेच्छा देण्यासाठी सोशल मीडियावर खास पोस्ट शेअर करताना दिसत आहेत.
‘बिग बॉस’चं १८वं पर्व जिंकल्यानंतर करणवीर मेहरा म्हणाला की, मी ज्या क्षणाची वाट बघत होतो. अखेर तो क्षण आलाच. जनतेचा लाडका विजयी झाला. करणला ‘बिग बॉस’च्या ट्रॉफीसह ५० लाखांचा धनादेश मिळाला. याआधी करणने ‘खतरों के खिलाडी’चं १४वं जिंकलं होतं. त्यामुळे सध्या करणची तुलना सिद्धार्थ मल्होत्राबरोबर केली जात आहे. दरम्यान, करणवीर मेहरा विजयी होताच एका लोकप्रिय मराठी अभिनेत्रीने खास पोस्ट शेअर केली. तिच्या या पोस्टने सगळ्यांचं लक्ष वेधून घेतलं.
करणवीर मेहराला पाठिंबा देणारी ही मराठी अभिनेत्री दुसरी-तिसरी कोणी नसून अभिज्ञा भावे आहे. अभिज्ञा भावने व्होटिंग लाइन बंद होण्यापूर्वी करणसाठी खास पोस्ट केली होती. दोघांचा एक फोटो इन्स्टाग्राम स्टोरीवर शेअर करत लिहिलं होतं, “या धाडसी माणसाला व्होट करा. लवकरच व्होटिंग लाइन बंद होणार आहे. करणला विजयी करा, कारण तो त्यास पात्र आहे.”
हेही वाचा – ‘तुझ्यात जीव रंगला’ फेम अभिनेता व्यवसाय क्षेत्रात करणार पदार्पण, व्हिडीओ शेअर करत म्हणाला…
त्यानंतर करणवीर मेहरा विजयी होताच अभिज्ञाने दुसरी इन्स्टाग्राम स्टोरी शेअर केली. यावर तिने लिहिलं की, येSSSS…अखेर खरा निकाल लागला. ओके बाय.
दरम्यान, ‘बिग बॉस’च्या १८व्या पर्वाच्या महाअंतिम सोहळ्यात सहा सदस्य पोहोचले होते. यामधून सर्वात आधी ईशा सिंह एविक्ट झाली. त्यानंतर चुम दरांग, अविनाश मिश्रा घराबाहेर झाला. या दोघांनंतर रजत दलाल एलिमिनेट झाला. हे एलिमिनेशन जाहीर करताना सलमान खानला आश्चर्याचा धक्का बसला होता. अखेर करणवीर मेहरा, विवियन डिसेना या दोघांत चुरस पाहायला मिळाली आणि करण ‘बिग बॉस १८’चा महाविजेता ठरला.